A Garda Civil intercepta na A-8 un camioneiro lituano co tacógrafo dixital manipulado

Arredor das nove da mañá do mércores 13 de setembro, unha patrulla de especialistas na inspección de Transportes pertencentes ao Subsector de Tráfico de Lugo, que se atopaban realizando o seu labor inspector no P.K. 593 da A-8 (Behovia-Baamonde), detiveron a marcha dun camión de nacionalidade Lituana.

Ao proceder á súa verificación os axentes decatáronse da existencia dun interruptor escondido debaixo dos mandos do camión, o cal levantou as súas sospeitas e resultou ser un interruptor para alterar os rexistros do*tacógrafo. Tras revisar exhaustivamente as xornadas de traballo e os tempos de descanso chegaron á conclusión de que non coincidía o percorrido realizado co que os rexistros de medidas reflectían.

Á vista do anterior decidiron trasladar o vehículo a un taller especializado neste tipo de aparellos onde se descubriu que o interruptor activaba un electro-imán que actúa como interruptor eléctrico no cambio do vehículo facendo así que reflicta un período de descanso mentres o condutor segue conducindo.

O transporte realizábase entre Suecia e a localidade coruñesa de Padrón ao amparo dunha licenza comunitaria de transporte de mercadorías.

O condutor ademais da factura do taller tivo que facer fronte no acto a unha sanción de 2.800 euros, pois estas alteracións dos aparellos de medidas dos vehículos de transporte, tanto de mercadorías como de viaxeiros supoñen unha infracción moi grave á Lei de Transportes Terrestres.

Etiquetas