Rematados os traballos de acondicionamento da Prazuela de Rábade

Nos pasados días remataron as obras de acondicionamento da Prazuela de Rábade, despois de que se acometaran traballos de substitución do pavimento e renovación de sumidoiros financiados pola Vicepresidencia e Consellería de Presidencia, Administracións Públicas e Xustiza a través dun programa para a mellora de infraestruturas, dotacións, instalacións e equipamentos vinculados á prestación de servizos municipais.

A Consellería achegou 33.000 euros, o 80% do investimento total subvencionable da actuación. A prazuela de Rábade é un espazo emblemático da localidade que acolle moitos dos eventos festivos e culturais da vila. Está emprazada no centro neurálxico e urbano polo que constitúe un marco esencial de relación, actividade comercial e social neste concello.

Ademais este ámbito constitúe a principal vía peonil que usan os veciños para pasar dun lado a outro da vía do ferrocarril, infraestrutura que condiciona o desenvolvemento urbano de Rábade. Por efecto do uso, o pavimento de madeira da praza estaba deteriorado e presentaba perigo de posibles caídas por deslizamento, especialmente no inverno.

As obras consistiron na retirada do pavimento de madeira e a demolición das soleiras de formigón e a colocación de novo pavimento a base de enlousado de granito aserrado. Tamén se instalaron novas arquetas cos seus colectores de PVC soterrados e catro canaletas de drenaxe superficial, para rematar con algúns elementos ornamentais -entre eles xardineiras, árbores e bordes de buxo-.

O delegado territorial lembrou que a Xunta colabora cos concellos rurais “para que os veciños e veciñas poidan dispoñer dos mesmos servizos e nas mesmas condicións que os de zonas urbanas, financiando proxectos de intervención en espazos públicos que cumpren unha función tanto de mellora estética e da confortabilidade como de dinamización social”.

 

Etiquetas