A Xunta licita as obras da estrada da Gañidoira

A Consellería de Infraestruturas e Vivenda vén de licitar novas actuacións de reforzo do firme na estrada autonómica LU-540, entre Viveiro e Cabreiros, de tal xeito que nos últimos dous anos o investimento global na mellora desta vía supera os 1,2 millóns de euros.

As obras desenvolveranse ao longo de cinco quilómetros desta vía, coñecida como a estrada da Gañidoira e, polo tanto, beneficiaranse os usuarios da mesma e, moi especialmente, a veciñanza dos catro concellos lucenses nos que se prevé actuar: Ourol, Xermade, Viveiro e Muras.

Destes e doutros detalles deu conta o delegado territorial da Xunta, José Manuel Balseiro, que se desprazou ata o núcleo de Merille, acompañado de alcaldes e concelleiros dos concellos afectados e técnicos da Axencia Galega de Infraestruturas, para presentar os traballos que permitirán unha circulación máis confortable e segura.

Balseiro explicou que as obras desenvolveranse en distintos puntos, desde o PQ 0+000, isto é o enlace coa estrada LU-540 en Viveiro, ata o PQ 39+520, enlace de Cabreiros. Os traballos consistirán no fresado daqueles puntos da estrada que presentan deterioro e posterior estendido dunha nova capa de rodaxe en mestura bituminosa en quente.

Ademais, nesta mesma estrada a Xunta prevé unha serie de actuacións complementarias que consisten basicamente no repintado da vía, coa correspondente reposición das sinais horizontais, e a mellora puntual da drenaxe mediante a execución de gabias de seguridade e implantación de tubos de drenaxe naqueles puntos nos que sexa preciso.

A previsión que manexa a administración autonómica é iniciar os traballos no mes de setembro, unha vez se adxudiquen, e o prazo de execución dos mesmos será de seis meses. As actuacións previstas neste proxecto non implican a realización de ningunha expropiación, porque todos os traballos a executar están incluídos dentro da franxa de dominio público.

Balseiro lembrou tamén que esta nova actuación, vén a completar a realizada o ano pasado noutros puntos deste mesma estrada e significou a importancia que ten o reforzo do firme nunha vía que asume gran intensidade de tráfico pesado e soporta condicións climatolóxicas adversas. De feito, o novo pavimento presenta unha mellor adherencia, menor nivel sonoro e un bo comportamento en canto á súa drenaxe superficial, así como maior resistencia á acción abrasiva do tráfico.

Etiquetas