Comer saudable sen tempo

Por Marta P. Fandiño

No día a día existen prioridades por diante da alimentación, posto que o ritmo de vida é moi apresurado e xa abondan preocupacións suficientes;  o traballo, a familia, a casa… Ditas actividades rouban a meirande parte das horas do día, facendo complicado dedicar tempo a alimentarse de maneira adecuada e ocasionando unha maior inxestión de alimentos precociñados, comidas fora da casa ou picoteos pouco saudables.

Así pois, aínda que o obxectivo dun sexa mellorar a súa alimentación, chegar máis activo ó final do día, non continuar coa subida de peso, durmir mellor ou evitar as longas e pesadas dixestións, a opción rápida e sinxela adoita ser a menos saudable. Pero realmente e preciso inverter un tempo prolongado na cociña para poder mellorar a alimentación diaria? Os seguintes trucos poden ser de utilidade para reducir os minutos dedicados a esta tarefa.

Un día para cociñar: Se pola semana non hai marxe de prender a cociña, débese aproveitar o sábado ou domingo para cociñar grandes cantidades de alimentos co fin de conxelar ou gardar no frigorífico diferentes alternativas e dispoñer delas nos momentos de máis apuro. Cocer arroz, pasta ou legumes en branco, asar verduras ou carne ó forno, facer un pisto ou deixar preparado un puré, permiten ter opcións saudables a man de luns a venres.

Planificar o menú semanal: Escribir un menú de comidas e ceas tendo en conta os tempos de cociñado, pode ser a mellor das opcións para evitar consumir alimentos insáns ó chegar a casa, posto que por todos é sabido que cando a sensación de fame é elevada, óptase polos alimentos máis calóricos e xa preparados, sen pensar sequera nunha opción saudable. Esta planificación do menú, pode mellorar a elección nese momento do día, así coma facilitar e reducir os tempos do momento da compra.

Unha compra semanal libre de alimentos superfluos: Canto menos produtos procesados haxa na casa, menor será o seu consumo semanal. Co menú xa planificado, débese elaborar unha listaxe da compra e evitar incluír durante a mesma ingredientes que non se atopen nela. Ir con fame non é recomendable, xa que pode influír en gran medida nos alimentos incluídos na cesta. Unha única compra por semana é mais que suficiente, permite aforrar tempo e aproveitar mellor os ingredientes e alimentos da casa.

Empregar conservas e alimentos cocidos: Na actualidade, aínda que non son maioritarios, tamén existen alimentos envasados saudables no mercado que poden empregarse no día a día e que resultan de gran utilidade a hora de preparar almorzos en menos de 5 minutos. Un bo exemplo son todas as conservas de peixes ou mariscos ó natural como os mexillóns, ameixas, navallas, atún… Tamén as legumes cocidas baixas en sal, como as lentellas, garavanzos e fabas en tarros de cristal ou as minestras, grelos, acelgas, coles de Bruxelas e similares que non conteñan máis ingredientes que os propios vexetais. Pódese optar tamén por champiñóns, millo, cenoria raiada ou pementos asados, sempre que non apareza azucre entre os seus ingredientes.

Comer no traballo: É posible que no descanso do almorzo non exista tempo de chegar a casa e preparar a comida, nestes casos é máis recomendable comer no traballo que saír ó restaurante, posto que deste xeito mellorase a calidade da alimentación semanal ademais de aforrar tempo e diñeiro. A preparación do tupper non ten por que ser moi laboriosa nin é preciso contar cun microondas na oficina; pódese optar por alimentos fríos coma ensaladas completas, de arroz, de pasta ou de quinoa integrais, de garavanzos, de lentellas, de xudías, etc.; lendo ven as etiquetaxes pódese incluso atopar opcións xa cocidas e saudables, polo que a única tarefa será mesturar diferentes alimentos. De poder quentar, as verduras (mesmo as de bote ou lata) con patacas e ovos cocidos ou con atún ó natural, peixes ou carnes da cea anterior, legumes vexetais e pastas e arroces con verduras continúan a ser boas alternativas.

Etiquetas