Novo éxito de vendas e visitantes na Feira do Capón 2018

Un ano máis, a Feira do Capón de Vilalba pechou un sold out provocado pola venda de exemplares os días previos ao inicio da feira. A venda de capóns na propia casa dos criadores funcionou moi ben e, finalmente, o día da feira tan só entraron no recinto 300 dos 1.800 capóns para a tradicional feira de Vilalba, que foron adxudicados en pouco máis dunha hora desde a apertura ao público da carpa habilitada polo Concello na Praza dá Constitución.

A edil Cheri Grandío, confirmou que entraron na feira moitos menos capóns dos previstos, cun prezo medio que se situou nos 80 euros, aínda que tamén había algún exemplar a 110 euros.

Estes exemplares presentaban nove meses de crianza nas explotacións e un peso que roldaba os seis quilos.

Por primeira vez na súa historia, o Capón de Vilalba puido ensinar a súa Indicación Xeográfica Protexida (IGP), recentemente concedida pola Unión Europea.

O alcalde de Vilalba, Agustín Baamonde, fixo referencia ao escaso número de exemplares que entraron no recinto co censo e afirmou que a tendencia de cara aos próximos anos camiña cara á conversión desta cita nunha feira de exaltación do produto, máis que un punto de compra e venda de capóns.

PREMIOS

Aurora Lozano, da parroquia de Oleiros, levouse o premio á Mellor Criadora dotado con 300 euros; Jesús Pérez Cortiñas, de San Simón de Costa, levouse o concedido á Mellor Cesta -catro exemplares-, dotado con 200 euros; e Alfonso Ramudo, tamén de San Simón, levouse os 100 euros concedidos ao Mellor Par de Capóns de Vilalba.

Etiquetas