A Xunta anuncia que o Hula terá servizo 24 horas en hemodinámica e o PSOE pide responsabilidades polo retraso

A Unidade de Hemodinámica do Hospital Universitario Lucus Augusti de Lugo ampliará o seu horario de funcionamento de forma continuada a 24 horas para procedementos urxentes e anxioplastias primarias a mediados de febreiro. Así o anunciou en rolda de prensa o conselleiro de Sanidade, Jesús Vázquez Almuiña, quen subliñou que o Sergas adopta esta medida seguindo a recomendación do grupo de expertos, que propón ampliar o devandito horario tras analizar os datos do Regaliam e constatar que se mellorou de forma substancial o tempo de diagnóstico ata a apertura da arteria tras a ampliación do horario ata as 22 horas adoptado nesta unidade en febreiro pasado.

O titular de sanidade indicou que os devanditos datos constatan tamén que a mortalidade por infarto de miocardio en Lugo mantense por debaixo do estándar de mortalidade do 5% establecido pola Sociedad Española de Cardiología como un estándar de calidade na atención.

Almuiña subliñou que desde o inicio da prolongación do horario ata as 22 horas na Unidade de Hemodinámica do HULA en febreiro pasado, e ata o 31 de decembro de 2018, o 75% das anxioplastias primarias atendéronse en Lugo sen necesidade de trasladar aos pacientes a centros doutras provincias. O tempo de resposta desde o diagnóstico ata a apertura da arteria neste período foi de 86 minutos (50 minutos menos que antes da ampliación horaria), unha cifra moi inferior aos 120 minutos recomendados polas sociedades científicas.

Durante a súa intervención, o conselleiro lembrou que dende a súa entrada en funcionamento no ano 2014, a Unidade de Hemodinámica do Lucus Augusti foi sometida a numerosas e sucesivas melloras, como o incremento de persoal e a súa integración total no HULA. As actuacións do Sergas centráronse en aumentar a carteira de servizos desta unidade e do propio servizo de Cardioloxía, así como incrementar a súa capacidade de resolución e a súa autonomía de acción.

Coa ampliación do horario a capacidade da Unidade de Hemodinámica do HULA será maior e permitirá ofrecer á cidadanía de Lugo os maiores niveis de calidade na atención cardiolóxica. Con esta medida tamén se cumpren os obxectivos do Sergas de prestar á poboación lucense a mellor asistencia sanitaria posible.

PSOE PIDE RESPONSABILIDADES POLO RETRASO

O Secretario Xeral do PSOE na Provincia de Lugo, Álvaro Santos, xunto ao Secretario de Sanidade do PSOE e voceiro municipal socialista, Miguel Fernández, valoraron o anuncio da Xunta de Galicia sobre a posta en marcha de Hemodinámica 24 horas no HULA. Santos Ramos destacou que “Lugo gana ao PP. Pero isto non pode acabar aquí. Non imos permitir o silencio sobre as dramáticas consecuencias humanas por retrasar esta decisión política durante 10 anos”. Os socialistas seguirán a reclamar ao Goberno galego do PP a información que oculta sobre os lucenses que morreron por non contar con esta prestación na súa provincia e os danos ocasionados. Os últimos datos oficiais facilitados corroboran que Lugo lidera a taxa de mortalidade por infarto de miocardio aos 30 días en Galicia, duplicándoo con respecto á Coruña e Pontevedra: 4,6 fronte ao 2,9.

Santos Ramos lembrou que o PSOE no goberno bipartito da Xunta de Galicia modificou o proxecto inicial do HULA para introducir prestacións como Hemodinámica 24 horas, Radioterapia ou Medicina Nuclear que o PP xa non contemplaba para Lugo. No ano 2009, os socialistas deixaron o hospital listo e 38 millóns de euros para o seu equipamento. Coa chegada do PP ao executivo autonómico, os populares recortaron estes fondos, quitaron estes servizos e demoraron a apertura do HULA 2 anos. Foi o 26 de febreiro de 2011 cando Feijóo decidiu inauguralo e dixo textualmente: os pacientes con doenzas do corazón ou de cancro que antes tiñan que desprazarse a Santiago ou á Coruña poderán ser atendidos no seu hospital público de Lugo ao longo deste ano. Mentiu.

Por este motivo, a comezos do 2013, dous anos despois do falso compromiso do PP de Feijóo, o Partido Socialista promoveu unha campaña de mobilización cidadá para reclamar xunto aos veciños estas necesarias prestacións no HULA ao tempo que intensificou o seu traballo nas institucións, chegando a presentar máis de 80 iniciativas tan só no Parlamento galego.

Os socialistas comezaron a deseñar as primeiras pancartas reivindicativas, que saíron á rúa en febreiro dese mesmo ano, nunha concentración diante do hospital con maletas, simbolizando a viaxe dos lucenses para recibir estes servizos. Simultaneamente, mantiveron unha reunión na sede provincial con representantes das asociacións veciñais para reforzar a campaña de mobilización cidadá e presentar unha Iniciativa Lexislativa Popular. Dende o primeiro momento, houbo unha gran implicación veciñal, que resultou imprescindible, pois derivou nas manifestacións máis multitudinarias da provincia e na ILP co maior respaldo na historia da Cámara galega, recollendo máis de 4.000 sinaturas.

A presión política e cidadá supuxo que o Partido Popular se vise na obriga de dar pequenos pasos, coincidindo no tempo coa proximidade dunhas eleccións: tras as manifestacións máis concorridas nunca vistas en Lugo e coas eleccións municipais de 2015 á volta, o PP anunciou a posta en marcha de Hemodinámica ata as 15:00 horas, é dicir, en horario de oficina, en abril de 2014. Meses máis tarde, xa en vésperas de ditos comicios municipais, o Partido Popular de Feijóo anunciou a posta en marcha de Radioterapia. Con todo, este servizo non comezou a funcionar ata marzo de 2016. Fíxoo grazas á beneficencia, pois foi unha doazón da Fundación Amancio Ortega. Medicina Nuclear non chegou ata agosto de 2016, un mes antes das eleccións autonómicas.

Durante todo este tempo, o Partido Socialista solicitou á Xunta de Galicia os datos do Regaliam, un rexistro que creou no 2015 e ao que o PP sempre se amparou para negar a necesidade de Hemodinámica as 24 horas en Lugo. Nunca facilitou esta información.

Ante esta situación, a comezos do 2018, o Partido Socialista volveu a pedir esta documentación no Parlamento e deu un ultimátum ao PP, advertíndoo que no prazo legal dun mes (tempo que hai para contestar) acudiría ao TSXG se non facilitaba estes datos ao estar infrinxindo dereitos dos representantes na Cámara galega.

Este ultimátum supuxo que semanas máis tarde o PP ofrecese os primeiros datos parciais do Regaliam, impedindo que os socialistas tivesen éxito no caso de acudir aos tribunais, e que anunciase a posta en marcha de Hemodinámica ata as 10 da noite.

“Isto non acaba aquí”
Os datos parciais do Regaliam corroboran que entre xullo de 2015 e setembro de 2017 (non se ofrecen datos de 2018 nin máis actuais) Lugo liderou en Galicia a taxa de mortalidade por infarto de miocardio aos 30 días cun 4,6 fronte ao 2,9 da Coruña e Pontevedra. Tamén constatan que o 75% dos lucenses tiveron que ser trasladados á Coruña e que os lucenses tardaron máis que calquera outra galego en ser atendido, pois o tempo medio de espera foi entre 191 minutos e 136 fronte aos 87 minutos da Coruña. Os socialistas xa avanzaron en aquel momento que seguirían a reclamar a información completa para coñecer as verdadeiras consecuencias humanas das familias lucenses por non contar cunha prestación 24 horas por unha decisión política, defendendo aos veciños da provincia. Ademais, sinalaban estar convencidos de que a presión política e veciñal ía desembocar na dotación de Hemodinámica 24 horas, pero que non acontecería moito antes dunhas eleccións, como sucedeu con todos os avances.

Santos Ramos valorou que os feitos demostran que “Lugo gana ao PP. A presión política e principalmente a masiva e imprescindible implicación veciñal obrigou ao Partido Popular a implantar Hemodinámica 24 horas no HULA. Grazas a todos os veciños. Hoxe máis que nunca sentímonos orgullosos de ser de Lugo. Pero a batalla non pode rematar aquí. Non podemos permitir que queden no silencio as consecuencias humanas provocadas por non ter este servizo en 10 anos por unha decisión política”.

“Temos que seguir reivindicando o noso dereito a coñecer esta información en defensa dos veciños que directamente se viron afectados e dos que nos puidemos ver na mesma situación: os 330.000 lucenses. Dende o Partido Socialista seguiremos a traballar na consecución desta información por xustiza, pois os danos desgraciadamente xa son irreparables. Hoxe o Conselleiro debería pedir perdón. E máis, hoxe o que debería estar aquí é Feijóo avergonzado polo sufrimento e agravio ao que seu partido, o PP, someteu a todos os lucenses”.

Etiquetas