A entrega dos premios Trapeiro de honra e As Vilariñas unifícanse na mesma data

A Asociación Sociocultural Lareira de soños dos Vilares xa ten escollido quen será distinguido co Premio Trapeiro de Honra 2019 e o acto de entrega do prémio e da III edición do Certame Vilariñas de micro poesía terá lugar o 19 de outubro ás 19:00 na Casa Habanera de Guitiriz.

Este ano será Sara Veres Vázquez, coñecida tamén como Sara das Reixas ou Sara de Camilo, muller emprendedora en tempos nada doados que viveu desde ben pequena a experiencia da emigración e que foi taberneira, tivo mercería e foi tamén unha grande bordadora, mestra de outras moitas que viñeron despois.

Sara, cruzou o Atlántico con meses cara a Cuba cos seus pais. Era o ano 1925. Regresaron de novo á casa aos catro anos e Sara era unha nena cubana que na aldea lle facían falar, porque lles daba moito gusto oíla.

Na III edición do Certame Vilariñas, o primeiro premio corresponde á viguesa con orixes en Begonte Beatriz Coira Ríos, o segundi ao berciano Manuel González Prieto e o terceiro á arousana Ana García Rivas. Este tres gañadores faranse coa fermosa figura deseñada pola artista Viki Rivadulla, pezas únicas feitas a man que conforman a imaxe deste concurso cada día máis popular.

Así como no 2018 homenaxearon a Alfonso Blanco Torrado, na edición 2019 honrarán á escritora, mestra e poeta Marica Campo, orixinaria do Incio e con fondas vinculacións a Guitiriz e á Terra Chá. Neste acto, xuntarán por primeira vez estes dous recoñecementos, e contarán con importantes participacións poéticas e musicais ademais de ser unha actividade aberta ao público.

Nas edicións anteriores, gañaron as Vilariñas Andrea Araújo Alonso de A Guarda, Pedro Rielo Lamela de Pontevedra, Toño Núñez, de Navia, Beatriz Dourado de Lugo, Mila Villanueva de Valencia e Cris Amoedo de Vigo. Nesta edición, as tres Vilariñas irán a Vigo, O Bierzo e Vilagarcía.

Despois dos actos, teremos a tradicional cea Vilariña.

Etiquetas