O auditorio municipal de Chantada acolleu unha proposta nova que forma parte das actividades complementarias da 41 edición da Feira do Viño de Chantada que se celebraba a pasada fin de semana, a I edición do Work Ribeira Sacra, primeiro evento networking que se realiza ao redor desta emblemática cita que exalta o viño das ribeiras de Chantada.
A concelleira de turismo de Chantada, Pamela Fernández, inaugurou a xornada promovida polo Concello de Chantada e estivo conducida por Silvia Panadeiros de WorkEvents. Ademais, acudiron a coñecer as experiencias que trasladarían: Alexandra Seara, xerente do Consorcio de Turismo de Ribeira Sacra; Beatriz Pérez de Máis que Románico; Manuel Gallego, responsable da área de turismo cultural en Xeitura Patrimonio SCG e Idoia Costa, investigadora especializada en Cestaría.
Despois dos distintos relatorios tivo lugar unha mesa redonda coa participación dos asistentes, onde se abordaron cuestións como a gastronomía, o patrimonio, os recursos e potencialidades do territorio Ribeira Sacra e como emprender ou desenvolver un negocio promocionando este tipo de valores. O punto e final a esta primeira edición de Work Ribeira Sacra Chantada tivo lugar no Restaurante Pulpería Os Pendellos onde gozaron da gastronomía e dos viños locais.
A iniciativa Work Ribeira Sacra estaba destinada, principalmente, a empresarios, autónomos e emprendedores que desenvolven os seus proxectos de vida na Ribeira Sacra.
