Skip to main content
ActualidadeVilalba

Varios detidos por roubo e furto en Vilalba e Outeiro e Castro de Rei

Por 3 Outubro, 2019Sin comentarios

A Garda Civil detivo en Castro de Rei aos tres presuntos autores de dous delitos de roubo, un delito de furto e un delito de estafa cometidos o pasado mes xuño.  O día 12 de xuño, os presuntos autores foron sorprendidos cometendo un roubo de material de construción nunha nave industrial situada no termo municipal de Castroverde. Así mesmo foron vinculados cun furto de ferramentas no alpendre dunha vivenda situada no termo municipal de Castro de Rei nun prazo breve de tempo.

O mesmo día foi localizada a furgoneta na que circulan os presuntos autores na estrada N-640 e ao tentar identificar os ocupantes do vehículo, estes fan caso omiso ás indicacións dos axentes e na súa fuxida teñen unha saída de vía, podéndose identificar os tres homes que ocupaban o vehículo, os cales tiveron que ser auxiliados polos servizos de emerxencia. No rexistro do vehículo localízase gran cantidade de ferramentas e material, sendo incautado ao sospeitarse da súa procedencia supostamente ilícita.

A Garda Civil iniciou unha investigación que deu como resultado o esclarecemento dos feitos anteriormente mencionados, así como outro delito de roubo con forza cometido durante a madrugada do 05 ao 06 de xuño do presente ano nunha parcela anexa a unha nave industrial situada no termo municipal de Castro de Rei, onde supostamente estas mesmas persoas subtraerían material de construción.

No transcurso da investigación localizouse parte dos materiais subtraídos en Castroverde e en Castro de Rei. O valor total das ferramentas e material de construción subtraído ascende a uns 8.000 euros. Así mesmo, investígaselles como supostos autores dun delito de estafa ocorrido o 10 de xuño na localidade de Guitiriz, ao irse sen abonar o combustible enchido na área de servizo.

As persoas detidas foron postas a disposición xudicial.

OUTEIRO DE REI

Por outra banda, a Garda Civil imputou en calidade de investigados en San Cosme de Barreiros a dous veciños da localidade de Outeiro de Rei, de 38 e 40 anos de idade, como supostos autores dun delito de lesións. Os supostos feitos tiveron lugar o pasado día 24, cando os presuntos autores provocan policontusiones á persoa denunciante. As persoas investigadas foron postas a disposición xudicial.

VILALBA

A Garda Civil detivo tamén na localidade de Vilalba a unha veciña de Lugo, de 36 anos de idade, como suposta autora dun delito continuado de furto. Os feitos tiveron lugar nunha zona de acampada situada no termo municipal de Guitiriz, cando a persoa detida supostamente subtraiu do interior de tendas de campaña dous teléfonos móbiles aproveitando a ausencia dos seus lexítimos propietarios. Os terminais subtraídos son valorados en 900 euros. A persoa detida foi posta a disposición xudicial.