Hoxe comezarán os labores de desbroce das estradas provinciais. Os traballos, que contan nesta anualidade cun orzamento de 750.000 euros, arrancarán á primeira hora da mañá e de maneira simultánea nas 24 zonas nas que está dividida a roza da rede viaria dependente da institución.
Tal e como xa avanzou José Tomé durante o Pleno ordinario celebrado o pasado martes, “será a primeira vez en moitos anos que os desbroces das estradas provinciais comezan o día 1 de xuño co fin de que no mes de xullo estean totalmente rematados os traballos nos 4.200 quilómetros de vías provinciais”.
Os desbroces mellorarán a seguridade viaria e a calidade e comodidade dos condutores, ademais de favorecer a prevención de incendios durante o verán.
As tarefas divídense en 24 zonas de actuación que inclúen todas as vías provinciais e nas que todas se iniciarán hoxe. Na comarca son as seguintes:
– Zona 3: Muras, Xermade e Vilalba.
– Zona 5: Mondoñedo e Abadín.
– Zona 6: A Pontenova, Riotorto e A Pastoriza.
– Zona 7: Cospeito, Rábade, Outeiro de Rei, Guitiriz e Begonte.
– Zona 8: Castro de Rei, Pol e Meira.
– Zona 11: Friol.
