Taboada y Ramos S.L.

O Pxom de Guitiriz entra hoxe en vigor

O Pxom de Guitiriz entra hoxe en vigorO Plan Xeral do Concello de Guitiriz será o instrumento urbanístico que rexerá a partir de hoxe a ordenación do municipio. Entra en vigor tras cumprirse os 15 días hábiles despois da súa publicación no Boletín Oficial da Provincia substituíndo ás normas subsidiarias vixentes desde o ano 1985.

O pasado 1 de xuño a alcaldesa de Guitiriz, Marisol Morandeira; a conselleira de Medio Ambiente, Territorio e Vivenda, Ángeles Vázquez; e a directora xeral de Ordenación do Territorio e Urbanismo, Encarna Rivas, firmaron na Casa Habanera a orde de aprobación definitiva

Desde hoxe será o Pxom o que guíe aos veciños e veciñas de Guitiriz e marque o desenvolvemento e o crecemento urbanístico da vila. Marisol Morandeira lembrou que “pouco a pouco, iremos presentando modificacións puntuais ao Plan que o farán máis completo e permitirán subsanar, dunha forma máis áxil, os aspectos nos que se atope desactualizado”.
O Plan pode consultarse na web municipal dentro do seu apartado de Urbanismo.

Detalles do plan

Desde o punto de vista do solo urbano, o Plan Xeral xera novos espazos para o desenvolvemento directo en Guitiriz e Parga. Estes executaranse a través do propio PXOM ou ben por medio de figuras interpostas como plans especiais co obxectivo de ir compactando os núcleos urbanos.

Un dos elementos máis importantes que permite o documento de ordenación é o recoñecemento dos núcleos. Pola tipoloxía do territorio foron lugares sumamente complicados de ordenar e, feito o traballo, agora poderán desenvolverse.
En canto ao parque empresarial, favorece a súa consolidación ampliando a superficie para que poida acoller novos proxectos. Para as zonas libres e verdes reserva 92.519 metros cadrados e, para equipamentos comunitarios, outros 49.820 metros cadrados.

O Pxom de Guitiriz supón o primeiro recoñecemento da súa singular estrutura territorial, tan achegada á comarca da Terra Cha á que pertence, desde o mundo do planeamento. Pero as súas peculiaridades non están só no que se ve como a nova ordenación dos espazos urbanos das vilas de Guitiriz ou Parga ou a regulación complexa dun sistema de asentamentos tan espallados.

Quizais a achega máis extraordinaria do plan de Guitiriz estea no proceso, especialmente no que atinxe á colaboración activa dos cidadáns: este plan foi dos primeiros en implementar unha web participativa asociada a un sistema de información xeográfica en Galicia, instrumento aínda pouco usado no planeamento xeral, foi tamén dos primeiros en elaborar unha axenda 21 local asociada á súa tramitación, todo o cal implicou un coñecemento moi extenso e intenso da opinión dos habitantes do concello, a través de varias enquisas e actividades que, peneirada polos sucesivos filtros administrativos, resultou no esforzo coral como o que representa o documento que agora se aproba, tras un longo camiño iniciado en outubro de 2004.

Etiquetas