Central das Pontes
Endesa construirá nas Pontes a súa maior planta de hidróxeno en España, con 100 MW de potencia, e seis parques eólicos, con outros 611 MW, por un investimento total de 738 millóns de euros, tal e como anuciou na Mesa de Transicón Xusta. A planta levantarase nunha superficie próxima á súa central na localidade e na obra, entre xaneiro de 2023 e decembro de 2024, traballarán unhas 120 persoas.
A empresa explica que investirá 127,2 millóns nun gran electrolizador para fabricar hidróxeno.
A instalación das Pontes terá unha produción anual de 10.000 toneladas, cun funcionamento do electrolizador de 5.800 horas, equivalentes a nove meses. A produción de hidróxeno renovable evitará a emisión á atmosfera de 37.758 toneladas de CO2 por ano, e o aforro de enerxía primaria estímase en 18.640 toneladas equivalente de petróleo por exercicio.
A compañía avisa de que o proxecto é unha iniciativa que carece de viabilidade comercial polo estado do mercado e da tecnoloxía, razón pola que precisa apoio público; de feito, xa solicitou fondos europeos para garantir a súa viabilidade. Neste sentido, o Goberno anunciou axudas por 1.500 millóns para hidróxeno ata 2023.
PARQUES EÓLICOS
En paralelo a estes traballos, entre xullo de 2023 e decembro de 2024, Endesa levantará nas proximidades das Pontes seis parques eólicos que sumarán 611 MW. A construción xerará 1.600 empregos durante eses 18 meses, cun investimento de 611 millóns, o que eleva o investimento total do proxecto ata os 738,2 millóns.
Aproveitarase a enerxía eléctrica dos parques eólicos vinculados para transformar auga en hidróxeno por medio de electrólise. A instalación contará tamén con sistemas de almacenamento, así como de distribución, do combustible resultante. É dicir, Endesa producirá o combustible e ocuparase da súa loxística e transporte.
A planta de hidróxeno situará As Pontes uno dos focos do proceso de transformación que está a vivir o sector enerxético, xa que o proxecto será unha referencia internacional polo combustible, polo tamaño e pola tecnoloxía.
A elección das Pontes inscríbese no Plan Futur-e, o paquete de medidas que Endesa aplicará para mitigar o cesamento de actividade na central térmica de carbón, que negocia co Goberno central, a Xunta de Galicia e os sindicatos. Estes últimos defenden que a térmica podería reconverterse para consumir biomasa, mentres que Endesa considera que é económica e ambientalmente inviable.
As Pontes, ademais, posúe os recursos naturais (auga e vento), as infraestruturas enerxéticas e a cultura industrial que se necesitan. O proxecto forma parte da vintena de iniciativas para o desenvolvemento do hidróxeno verde en España que Endesa presentou o Ministerio de Transición Ecolóxica e Reto Demográfico, entre as que destacan as destinadas ás illas Canarias e Baleares.
BIOCOMBUSTIBLES
Mentres tanto, administracións e sindicatos apostan polos biocombustibles como futuro inmediato da fábrica e entenden que deben centrarse en darlle viabilidade económica a este proxecto ou mesmo que atope un inversor que o faga.
Foron moitas as voces que se alzaron mentres Endesa permance en silencio sobre as probas realizadas unha vez que fixo público uns resultados negativos fai unha semana.
