Skip to main content
Sober

Agroma Sober critica a obra da rotonda en Doade que vén de anunciar a Xunta de Galicia

Sober debateu no pleno do Concello unha moción de SOS Sanidade Pública que reclamaba uns puntos básicos para a mellora do noso sistema sanitario.

Dende Agroma Sober-Interior Galego Vivo “defendemos esta proposta da Plataforma SOS Sanidade argumentando que a cuestión dos servizos públicos en Galicia é fundamentalmente un tema de modelo social e de financiamento”.

En primeiro lugar, din que a Xunta do PP aposta por reducir o peso do orzamento sanitario na economía, que representa un 7,4% do PIB galego, fronte ao conxunto do Estado (case un 11%). Por outra parte, o modelo PP “é a privatización de servizos públicos, pois o eufemismo da “colaboración público-privada” no Hospital de Vigo acabou costando máis que como construción pública e, de feito, a Xunta vén de quitar case 4 millóns de euros da partida de construción de centros de saúde comunitarios para obter crédito para pagar as facturas da concesionaria deste Hospital”.

Ademais, din que en Monforte a centralización sanitaria en áreas provinciais, quitando capacidade de xestión e de contratación nas comarcas, leva aos hospitais comarcais á perda de especialidades e falta de profesionais.

“Neste momento, que no sur de Lugo temos un grave problema de falta de pediatras, a Xunta decide presentar un proxecto de rotonda no cruce de Doade que suporá un gasto de 408.000 euros. Non nos opoñemos a proxectos que melloren a seguridade viaria da zona e dese cruce, pero non require unha obra de tal magnitude, podendo solucionarse con un cuarto do total do que se vai gastar”, explican. “Ademais, na propia parroquia de Doade hai moitas necesidades en vías de comunicación, como o arranxo de todo o núcleo de Francos de Doade, que leva anos agardando”.