Skip to main content
Cultura RIBEIRASACRAXAMonforte

Manuel González Guerra, un sexenio de servizo na Oficina Municipal de Turismo de Monforte

Por 14 Xaneiro, 2024Xaneiro 15th, 2024Sin comentarios
Por Carlos Gegúndez.

Elas e eles son a primeira imaxe do destino e moitas veces tamén a súa carta de presentación, os informadores turísticos. No seu sector, teñen un cometido complexo e unha grande responsabilidade, iso sábeo á perfección Manuel González Guerra (Monforte de Lemos, 1994) que acumula máis dun lustro prestando servizo aos turistas que visitan a Oficina de Información Turística de Monforte: “Comecei aquí facendo as prácticas no outono de 2017 e logo de rematar incorporeime a traballar de forma definitiva ata hoxe”.

Graduado en GIAT e con moitas horas detrás do mostrador, Manuel González destaca o incremento no número de visitantes dende os seus inicios, agás durante 2020 por causa da crise da COVID-19. Non obstante, ao ano seguinte produciuse “un pico bastante notable respecto a outros anos, probablemente condicionado tamén polas limitacións para viaxar ao estranxeiro”. Aínda así, a tendencia alcista vense mantendo e moitos visitantes mesmo repiten porque “ao fin e ao cabo a zona é moi ampla e sempre quedan cousas pendentes”, sinala Manuel.

A maior parte dos viaxeiros que chegan á capital da Ribeira Sacra son españois e segundo o noso protagonista: “Os madrileños veñen todo o ano. País Vasco e Asturias son importantes emisores, aínda que no verán Cataluña aparece tamén nos primeiros postos”. Obviamente son moitos os visitantes galegos e entre os estranxeiros “os franceses son quizais os máis numerosos”, afirma González Guerra.

É innegable que o traballo desenvolvido na promoción do destino está a dar os seus froitos, un dos feitos máis comentados entre os turistas e que chamou a súa atención foi segundo González: “a emisión de ‘Volando voy’, o programa de viaxes de Jesús Calleja quen gravou un dos seus episodios na Ribeira Sacra e tamén a lectura de ‘Todo esto te daré’, unha novela de Dolores Redondo gañadora do Planeta en 2016 e ambientada nestas terras”.

Á hora de falar das preferencias dos visitantes o informador turístico precisa que cómpre fixar dous grupos. Aqueles que preguntan pola cidade do Cabe mostran interese “pola visita aos Escolapios, xa que o edificio chama a atención esteticamente e tamén polas propias dimensións, demandan información sobre o casco antigo, o conxunto de San Vicente e o Museo do Ferrocarril e medra o número de interesados en visitar o Centro do Viño”.

Por outro lado, están os que preguntan pola Ribeira Sacra e neste caso é a información relativa ás rutas fluviais a que ocupa o primeiro lugar. Nun ránking a orde sería de máis a menos, “os catamaráns, os miradoiros, os mosteiros e finalmente as adegas”. En xeral, a experiencia resulta moi agradable para os visitantes e segundo Manuel: “A todo o mundo lle deixa bo sabor de boca, os que veñen marchan encantados, ás veces téñenme contado que as estradas que van a carón da Ribeira impoñen un pouco, pero en xeral a sensación é moi boa”. Mais tamén hai algúns aspectos que consideran mellorables, o monfortino ten escoitado disconformidade coas “limitacións horarias dalgúns puntos de interese xa que funcionan con pases guiados, a horas concretas e moita xente non quere estar condicionada por estes horarios”.

Outra queixa está relacionada cos novos tempos e a dificultade das persoas de máis idade para manexar as novas tecnoloxías: “a crecente aparición das reservas online xa que unha parte importante dos turistas que recibimos son maiores, este perfil ten máis presenza do que parece e moitas veces teñen dificultades para acceder a certos monumentos ou servizos”.

Os que coñecen a Manu saben da súa profesionalidade e paciencia, cualidades indispensables, entre moitas outras, para ofrecer unha boa atención ao visitante, a bo seguro que é capaz de disimular cando se presenta algunha anécdota divertida, sabe ben que hai que manter a compostura aínda que non resulte doado, cando lle preguntamos ao respecto retruca: “Teño unha morea de anécdotas, podería escribir un libro” e revela algunhas imperdibles: “Un día veu un matrimonio a Monforte buscando as luces de Nadal de Vigo e querían saber se o Sil tiña praia polos dous lados, noutra ocasión apareceu unha persoa que debía andar desorientada e preguntaba pola hora da baixamar para ir á praia das Catedrais”.

Non erramos se pensamos que ao final e aínda que estes turistas non atoparon o que buscaban gozaron da viaxe, porque o que máis se valora é “a paisaxe en xeral e máis concretamente as viñas, isto permítelles apreciar o significado da viticultura heroica”, conclúe Manuel.