Skip to main content
ActualidadeXermade

Níscaros e boletus para degustar en Roupar na XIX Festa dos Cogomelos

Por 20 Outubro, 2017Sin comentarios

A Asociación de Veciños do Campo de Roupar presentaron a XIX Festa dos Cogomelos xunto a representantes do Concello e da Deputación.

O deputado de Turismo, Eduardo Vidal Baamonde, xunto ao alcalde de Xermade, Roberto García Pernas, e o presidente da Asociación de Veciños do Campo, José Corral, presentaron a XIX Festa dos Cogomelos, que terá lugar o vindeiro sábado 28 de outubro na Carballeira do Campo de Roupar.

Esta será xa a décimo novena edición da Festa dos Cogomelos que dará comezo arredor das dúas e media do mediodía cun xantar popular composto por empanada de cogomelos, níscaros en salsa con arroz branco, boletus con carne, sobremesa, café e bebidas que preparan dende a directiva da propia asociación.

Os tíckets, que terán un prezo de 15 euros, poderanse recoller ata o mércores 25 de outubro nos seguintes establecementos: Bar Petróleo, Bar Moncho e Bar Ares (Roupar), Bar O Paso (Candamil), Bar Doucello (Cabreiros), Bar Cristal e Bar O Porrás (Vilalba), Bar A Fervenza e Café Bar Daniel (As Pontes), Bar Pita e Bar Casal (Xermade), Restaurante Tino (Momán). Os menores de 12 anos terán entrada de balde. Tamén haberá sesión vermú e verbena co Dúo Trópico.

O rexedor local que participaba xunto ao tenente de alcalde na presentación desta cita, anima a veciños, veciñas e visitantes a participar nesta festa tras degustar os pratos que se servirán o sábado 28 en Roupar. “Están deliciosos”, dixo.

A Deputación, principal patrocinador
O organismo provincial é o principal patrocinador desta cita cunha achega de 6.000 euros, coa que tamén colaborou co Concello de Xermade na organización do XVII Encontro de Torneiros da Madeira, dous eventos que logran reunir a centos de persoas neste municipio chairego.

Eduardo Vidal subliñou que “colaboramos con este evento dentro da nosa aposta por potenciar cada un dos recursos dos nosos Concellos como un valor diferencial que nos converten nunha provincia única, que cambia de recuncho a recuncho, e que é capaz de ofrecer unha oferta turística totalmente diferente. Precisamente, esta é unha das liñas de traballo que define o primeiro Plan Estratéxico de Turismo na provincia, totalmente participativo, que fixemos dende o Goberno da Deputación, co obxectivo de xerar riqueza e dinamizar o emprego a través do turismo”.