Unha veciña de Abadín demanda ao Concello unha reforma para poder saír da súa casa

Pilar Fernández López naceu nunha casa no Coto, Abeledo, concello de Abadín. Trátase da casa na que aínda segue vivindo. Pili ten mobilidade reducida cun grao de discapacidade do 84% e precisa cadeira de rodas.

Fai uns corenta anos botóuselle pedra ao camiño que pasa xusto por diante da casa e converteuse nunha pista que quedaba practicamente ao nivel da entrada da casa. Dende hai vinte anos a pista foi asfaltada como mínimo tres veces, polo que o nivel da mesma pasou máis de 12 centímetros por riba da entrada da casa. Estas obras ocasionáronlle un problema importante, xa que o desnivel coa entrada da súa casa é tan grande que non pode saír da vivenda sen axuda xa que o desnivel supera xa o límite.

No 2013, 2014 e 2015 Pili tivo coñecemento de que ían volver botar aglomerado sobre a pista e presntou varios escritos ante o concello de Abadín solicitando que nese novo amaño non só non aumente se non que se elimine a barreira, pero non recibiu resposta por parte do Concello.

Xa no 2016 a Valedora do pobo contestoulle dicindo que iniciou “xestións directas co concello”, e que tras falar co alcalde de Abadín este dixolle que xa o intentara e que ademais había dificultades técnicas. Por esta razón a Valedora pediu ao Concello un informe técnico sobre a solución do problema e que tan pronto como o recibira poñeríase en contacto con Pili para dar conta das actuacións. O alcalde contestou e dixo que non lle fora posible poñerse en contacto co redactor do proxecto e que desexaba tal cousa para concretar todos os extremos do mesmo.

A finais do 2016 o alcalde de Abadín concertou unha cita cun representante do grupo de apoio para darlle unha solución “rápida” a todo este asunto. Un ano despois a Valedora do pobo insta de novo ao concello de Abadín a que no prazo de 15 días facilite información sobre este problema.

En marzo de 2018 a Valedora do pobo indicou  que “o Concello de Abadín persiste na súa actitude de non enviar a información requirida en relación coa súa queixa, a pesar de que a demandamos en tres ocasións”.

Na manifestación polo Día da Muller de Vilalba do 2019 expúxose o caso de Pili e deuse lectura a un manifesto que a propia Pili fixo sobre o seu caso.”O concello de Abadín castiga a Pilar Fernández López, unha muller da parroquia rural de Abeledo, xubilada, con grave discapacidade a non poder entrar e saír pola porta da súa casa, esa que con tanto esforzo mellorou e adaptou durante toda unha vida”.

Change.org acolle unha petición, con máis de 2.543 firmas ata agora contra a “violencia institucional” do Concello de Abadín. Tamén lle presentaron un estudo técnico que valoraba en 5.600 euros a modificación necesaria pero nada lle fai rectificar ao alcalde.

Pasaron xa cinco anos e medio dende o primeiro escrito de Pili e aínda non recibiu resposta, aínda segue sen poder saír pola porta da súa casa coa cadeira de rodas de xeito autónomo.

Etiquetas