Tralo remate con éxito das xestións do alcalde da Pastoriza, Primitivo Iglesias, coa empresa Naturgy, esta semana deron por concluídas as obras de reparación das pistas municipais de utilizaron para a construción do parque eólico da Ribeira. Foron un total de quince quilómetros os que se recuperaron a través de aglomerado da estrada da Ferradura dende o límite de Abadín por Loboso ata a estrada da Deputación en O Castelo (A Regueira) e dende Loboso polo parque eólico do Rodeiro ata Corbelle.
Tamén traballaron noutra pista que atravesa a parroquia de Corbelle, coñecida como a pista da Ferreirauva. Ademais, en convenio co Concello de Abadín, nuns poucos metros deuse saída á parroquia de Vilarente, no lugar da capela de Santa Margarita, que tamén se fixo en aglomerado.
Segundo indicou o alcalde, despois do grave deterioro no que quedaron nos últimos meses polo continuo paso de tráfico pesado, “agora quedan nun estado moi satisfactorio”. A intención do Concello é finalizar cos traballos de pintado.
Primitivo Iglesias adiantou que están a realizar as últimas xestións para abrir o antes posible ao público un museo histórico en Bretoña. A intención é que poida abrir a principios de agosto pero para iso necesitan rematar o antes posible algunhas xestións burocráticas.
O obxectivo deste museo é por en valor a antiga diócese britoniense, que estivo vixente entre os séculos V e VII e contou cunha gran afluenza nos primeiros albores do Reino de Galicia.
O museo ubícase na Casa da Galocha, tamén coñecida como Casa do Médico, unha vivenda particular que o concello adquiriu fai varios anos para rehabilitar.