Alumnos do IES Pedregal de Irmia recibiron un premio no concurso Tíralle da Lingua

Un grupo de rapaces do IES Pedregal de Irimia de Meira obtivo un segundo posto no XVIII Concurso de Relato Oral Tíralle da Lingua, organizado pola Asociación Socio-Pedagóxica Galega (AS-PG), que tivo lugar no Pazo de Feiras e Congresos de Santiago de Compostela e ao que acudiron preto de 1000 rapazas e rapaces de centros educativos de toda Galicia.

Sendo a primeira vez que participaba, baixo a coordinación do Departamento de Galego e do Equipo de Dinamización da Lingua Galega, o IES Pedregal de Irimia acadou o 2º posto no nivel de 4º de ESO / BAC. O equipo estaba formado por Brais Marquez, Carlos Fernández González, Anton Chain Murado e David Costa.

Do mesmo centro tamén participaron Sergio e Diego de 2º de ESO e Maryam El Hidam de 4º de ESO.

Tíralle da lingua é un proxecto da Asociación Socio-Pedagóxica Galega (AS-PG), dirixido ao alumnado e profesorado, co obxectivo de incentivar e normalizar o uso oral da nosa lingua, converter o idioma en instrumento de comunicación normal, de creación e recreación de historias, en definitiva, de devolverlle ao galego o espazo que lle corresponde.

A alta participación dos centros, fixo desdobrar o concurso de forma simultánea por categorías. Ano tras ano, esta experiencia foise asentando nos centros de ensino, implicando ao profesorado cada vez máis, facendo unha fase previa nos centros para a selección de contadores e contadoras e historias que se presentaron en Compostela.

Etiquetas