Skip to main content
Actualidade

Rematan as obras da caseta do polbo de Castro de Rei

Por 9 Xaneiro, 2018Sin comentarios

Os veciños de Castro de Rei e os visitantes que acudan ás feiras do concello terá á súa disposición nunhas semanas un novo espazo para saborear o prato típico destes eventos, o polbo. As obras da caseta, situada no propio campo da feira, na contorna da casa consistorial, xa están finalizadas, tal e como indicou o rexedor de Castro de Rei, Francisco Balado, que anunciou que “xa se pode abrir cando se queira usar”. “Só faltan pequenos detalles, como colocar un cartel que indique a saída e trasladar ao novo local as mesas e as cadeiras para que se poida ofrecer o servizo”, dixo o alcalde.

Membros da asociación de Amigos da Feira de Castro de Rei, que ata agora cedía un local para que o pulpeiro servise aos seus comensais, indican que, aínda que non hai unha data fixa, a inauguración será probablemente ao longo deste mes. A data aprazouse un pouco por mór do Nadal.

“A nova caseta fíxose para dinamizar a feira de Castro de Rei e para ter un novo espazo”, dixo o alcalde, que especifica que a feira se celebra cada 15 días, sempre en domingos alternos que non coincidan coa de Meira. “É unha feira que se mantén, pero estamos a tentar impulsala porque se pode conseguir unha maior afluenza”, di Francisco Balado, que lembra que esta actuación supuxo un investimento de 70.000 euros, con 50.000 financiados cunha subvención da Axencia Galega de Desenvolvemento Rural (Agader) e outros 20.000 que puxo o Concello.

A nova instalación, construída en madeira e cos laterais acristalados co obxectivo de conseguir a súa máxima integración no espazo, ten unha superficie de 60 metros cadrados, con capacidade para acoller a medio centenar de persoas como máximo.