Skip to main content
ActualidadeCospeito

O PSOE de Cospeito afea ao alcalde por subirse o soldo ao máximo permitido

Por 26 Xullo, 2019Sin comentarios

Os socialistas de Cospeito afearon as decisións do pleno de organizacións por delegar todas as competencias posibles na Xunta de Goberno Local e a subida dos salarios ao máximo permitido por lei.

Segundo explican os representantes do PSOE, aprobouse constituír a Xunta de Goberno Local formada polo alcalde e tres concelleiros do grupo Popular con sesións ordinarias o primeiro e o penúltimo xoves de cada mes ás 13:30 horas. “O noso grupo municipal abstívose na votación por considerar que é una mera cuestión de preferencias da Alcaldía e sen ter en conta que no noso Concelo non dispón de regulamento orgánico”, indicaron.

Aprobouse celebrar as sesións ordinarias do Pleno o último xoves de cada mes impar, a partir do mes de setembro do ano en curso, ás 17:00 horas. Igualmente, cos votos a favor do Partido Popular, aprobouse delegar na Xunta de Goberno Local todas as competencias e facultades que a lei permite. “O noso grupo municipal abstívose, considerando que por unha parte confire axilidade á tramitación de certas actuacións municipais e que por outra, constitúe un acaparamento de competencias na Xunta de Goberno Local”, indicaron.

En referencia á creación e composición das Comisións Informativas permanentes o PSOE votou en contra da proposta do actual alcalde, que anula a Comisión Informativa dos asuntos do Pleno. “Nosoutros consideramos que a devandita Comisión é un órgano indispensable para aclarar os asuntos con anterioridade ao Pleno. Por tanto, a proposta da Alcaldía non é máis que outra estratexia para poñer trabas á información que se nos achega sobre os asuntos do Pleno”. Ademais, no que atinxe á Comisión Informativa de Urbanismo, “queremos lembrar que foi completamente inoperante dado que se reuniu unha vez en toda a lexislatura”. Isto é así, debido a que o PXOM está paralizado, por tanto “esta comisión é unha auténtica falacia para aparentar que se traballa neste ámbito. Demostrado queda, dicindo que tras 28 anos gobernando o mesmo Alcalde, aínda non existe PXOM; con todo o que isto supón”, recalcan.

No quinto punto simplemente se designa aos representantes da corporación en órganos colexiados. “Aínda que o noso desexo sería que estivera alguén da oposición nos mesmos, sabemos que a xenerosidade non é o principal don do actual Goberno Local. Así pois, abstivémonos”, alegan.

Os socialistas afirmarn que con respecto á anterior lexislatura o actual alcalde subiu o soldo en 2.000 euros máis, cobrando así o tope máximo permitido por lei (42.000 euros anuais incluída a Seguridade Social). Tamén ascendeu en 6.000 euros máis o do concelleiro de Obras, Infraestruturas Xerais…, cobrando así 24.000 euros anuais incluídas as cotas da Seguridade Social. “Nosoutros apreciamos a labor dos concelleiros con dedicación parcial, así e todo, consideramos innecesario subir ao máximo permitido por lei o soldo das dedicacións, sabendo ademais que no noso Concello temos os impostos máis elevados da comarca e unha débeda pública de dous millóns de euros. A decisión do alcalde amosa pouca coherencia coa casuística municipal e unha vez máis pon diante os intereses persoais dos veciñais. Con esta exposición, o noso grupo municipal abstívose”, conclúen.