O equipo de Goberno do Concello de Friol decidiu poñer ao dispor de todos os alumnos do municipio que non teñen conexión a internet nas súas vivendas un módem wifi. Este dispositivo entregarase por parte do Concello nas propias vivendas, coa finalidade de que resulte o máis cómodo e fácil de instalar e usar. Dispoñerán de datos ilimitados con tan só enchufalo, para poder realizar as tarefas que os docentes lles envían de forma telemática, durante este período de confinamento.
Desde a dirección do CPI Doutor López Suárez puxéronse en contacto co Equipo de Goberno para entre ambas as entidades tratar de buscar unha solución a esta falta de cobertura nas residencias onde residen algúns alumnos, desde un primeiro momento a colaboración foi máxima, de aí, que a medida que leva a cabo para emendar as devanditas deficiencias de cobertura sexa inminente.
Esta iniciativa é complementada pola Xunta de Galicia, que tamén poñerá computadores ao dispor das familias que non dispoñen desta ferramenta tan básica para o alumnado na actualidade.
O Alcalde, José Á. Santos, é consciente de que nas zonas rurais é máis difícil que todas as familias dispoñan de computador e conexión a internet e é coñecedor da existencia dalgúns alumnos que debido á falta destas ferramentas, teñen máis dificultades para acceder ao contido que poñen á súa disposición os centros educativos.
A principios da semana próxima estas familias poderán dispoñer do módem que lles facilitará a conexión a internet.
“Con esta iniciativa esperamos que os máis novos do municipio poidan levar a cabo os seus labores e actividades con maior autonomía. E que lles sirva tamén para dispoñer dunha maior variedade de entretemento e lecer para soportar mellor estes días de confinamento”, apunta o rexedor popular.
