Nova concentración veciñal pola apertura total do ambulatorio de Parga

As concentracións para reclamar a reapertura total do consultorio de Parga chegaron ao centro de saúde de Guitiriz, onde a pesar da choiva hoxe reuníronse ao redor de 200 veciños e veciñas do municipio para demandarlle ao Sergas que cumpra a súa palabra.

O consultorio, que se pechou ao inicio do Estado de Alarma para centralizar a atención en Guitiriz coa promesa de retomar a súa actividade cando este finalizase, só está a abrir os martes e os xoves para levar a cabo extraccións de sangue.

As mobilizacións continúan xa que o Sergas aínda non contestou á proposta dos representantes veciñais da Comunidade de Montes de Parga e o Comercio Local de Parga, que a semana remitiron un orzamento para instalar en Parga un módulo prefabricado dos utilizados no hospital de campaña instalado en IFEMA.

Todos os membros da corporación municipal acordaron na concentración celebrar o próximo luns, 6 de xullo, ás 19 horas un pleno extraordinario telemático no que se aprobe unha declaración institucional en apoio á veciñanza de Guitiriz e solicitando a reapertura total do centro de saúde de Parga.

Tamén se consensuou que esta sesión plenaria non suporía para os concelleiros e concelleiras ningunha retribución por dietas.

Etiquetas