O PP pide ao goberno nacionalista o abono aos clubs dos cartos da Copa Deputación

O Partido Popular manisfou a súa crítica contra a área de Deportes da Deputación, pilotada polo nacionalista Efrén Castro. Asegura que os clubs que participan na Copa Deputación de Fútbol aínda non cobraron as cantidades correspondentes á edición do 2020. “É certo que, a causa da pandemia, tivo que ser suspendida a Copa, pero ata ese momento xa se xogaran eliminatorias; o PP reclama que se lles abonen as cantidades correspondentes ás eliminatorias nas que participaron, que suman 62.385 euros”, di.

O deputado popular Óscar Poy sinala: “A Copa Deputación, que o ano pasado alcanzou a súa XXXVII edición, celébrase en virtude do convenio establecido a tal fin entre a Deputación e a Federación Galega de Fútbol. Debido á pandemia, disputáronse eliminatorias, pero non as semifinais nin a final. Cada eliminatoria representa un ingreso para os clubs que as disputan. Hai uns 70 equipos, tanto masculinos como femininos, afectados polo impago das cantidades correspondentes ás eliminatorias xogadas”.

O mesmo deputado explica que “as cantidades que deben percibir os equipos son moi diferentes, pero, en todo caso, contaban con elas para cubrir unha parte do seu orzamento anual, e son aínda máis necesarias nunha situación economicamente tan difícil como a xerada pola pandemia”.

Poy sinala: “A cantidade que a Deputación tiña asignada para este fin ascendía a 100.000 euros, dos que os clubs reclaman 62.385 polas eliminatorias disputadas. O procedemento habitual para que os clubs poidan ingresar os cartos que lles corresponden pola súa participación na Copa é o seguinte: ao final da temporada, a Federación envía á Deputación os datos de cada equipo e o organismo provincial fai os correspondentes pagos. O PP reclama que se ingresen aos clubs as cantidades que corresponden as eliminatorias que xogaron”.

RESPOSTA

O deputado de Deportes Efrén Castro aclarou que os clubs recibirán o diñeiro destinado á  última edición da Copa Deputación de Fútbol, suspendida o pasado mes de marzo pola situación sanitaria provocada pola covid-19.

Efrén Castro explicou que “se está a estudar a fórmula para que as entidades se beneficien do investimento que a área de Deportes destina á Federación Galega de Fútbol para a organización do torneo”.

O deputado lembrou que “malia as suspensións e paróns das competicións, a área de Deportes mantivo todas as liñas de axuda e investimentos previstos para clubs e entidades deportivas ao longo do ano e farémolo así tamén coa Copa Deputación de Fútbol. Iso é o que trasladamos tanto á Federación como aos clubs que se dirixiron a área de Deportes”, asegurou.

Castro desmentiu así as declaracións do deputado popular Óscar Poy en relación co torneo, que calificou como “inxustificadas e ridículas xa que son precisamente os recursos da Deputación e dos concellos os que están a manter o deporte de base e afeccionado nesta situación de pandemia, fronte a unha Xunta de Galiza que mira para outro lado, tanto nesta como noutras cuestións”.

Etiquetas