A Asapa celebrará unha festa de Pre-Fin de ano o 28 de decembro
A Pastoriza celebrará o Pre-Finde o 28 de decembro no local veciñal, situado na antiga ladrilleira, cunha programación que combina gastronomía, actividade física e música. O evento, organizado pola asociación Asapa en colaboración co Concello da Pastoriza, comezará ás 21:00 horas coa apertura de portas. As 50 primeiras persoas en chegar recibirán un boleto para participar nun sorteo que terá lugar despois das tradicionais uvas.
Ás 21:45 horas ofreceranse pinchos gratuítos para os asistentes, aínda que a bebida non estará incluída. A continuación, ás 22:30 horas, terá lugar unha exhibición de zumba a cargo do grupo As Resilientes, que animará a velada con movemento e enerxía.
Xa á medianoite, celebrarase a peculiar tradición das badaladas pre-finde, marcando simbolicamente a chegada do novo ano. O evento concluirá coa actuación musical do dúo Estrellas, que poñerá o broche final á noite. Ademais, contarase cun photocall para que os asistentes poidan inmortalizar os seus momentos no evento.
Esta celebración busca promover a participación veciñal e ofrecer unha alternativa lúdica e festiva nas datas previas ao fin de ano.