A Asociación de Empresarios de Vilalba celebra o anuncio da mellora do parque empresarial
A Asociación de Empresarios de Vilalba manifestou a súa "satisfacción" tras confirmarse que o Concello de Vilalba foi beneficiario de dúas subvencións concedidas pola Xunta de Galicia, destinadas á mellora de vías e á renovación do alumeado no parque empresarial.
"Esta nova representa un avance significativo na posta en valor do polígono industrial, que levaba varios anos sen intervencións relevantes de mantemento", din. Dende a chegada da nova directiva da Asociación, un dos seus principais obxectivos foi analizar por que o Concello non lograba acceder a estas axudas, a pesar de presentarse ás convocatorias públicas por concorrencia competitiva.
Durante o segundo semestre de 2023 levouse a cabo unha análise exhaustiva da situación, que permitiu identificar varios factores clave. Entre eles, destacan "o feito de que Vilalba non formaba parte da Rede de Concellos Emprendedores (Doing Business), o que penalizaba de forma notable a puntuación das súas solicitudes. Ademais, constatouse que, a pesar de poder presentar dous proxectos por anualidade, habitualmente só se presentaba un".
"Grazas ao traballo conxunto entre a Asociación de Empresarios e o Concello, e ao consenso acadado en 2024 cos catro partidos políticos para adherir Vilalba á Rede de Concellos Emprendedores, foi posible mellorar de forma notable a puntuación obtida na convocatoria", din. Unha vez priorizados os proxectos máis necesarios e viables, "logrouse por fin, despois de sete anos, obter financiamento para executar obras de mellora no parque empresarial".
Dende a Asociación de Empresarios de Vilalba quérese agradecer ao Concello a súa colaboración e coordinación no desenvolvemento dos proxectos, á Xunta de Galicia pola cofinanciamento das actuacións, e a todos os grupos políticos polo respaldo unánime a estas iniciativas. A entidade empresarial espera que "este modelo de traballo se manteña nos próximos anos e permita seguir avanzando no cumprimento do plan estratéxico marcado", conclúen.