A asociación de Santa Isabel poñerá en marcha en marzo unha feira mensual en Outeiro de Rei
A Asociación de Veciños Santa Isabel anunciou a posta en marcha dunha feira mensual en Outeiro de Rei, un proxecto no que a directiva leva tempo traballando e que finalmente se converterá en realidade a partir do mes de marzo. A feira celebrarase de maneira periódica o segundo sábado de cada mes, coa intención de dinamizar a vida social e económica da localidade.
A primeira cita está prevista para o 14 de marzo de 2026 e terá lugar tanto na praza como na rúa do Concello, espazos nos que se instalarán os diferentes postos. Desde a asociación fan un chamamento a todas aquelas persoas interesadas en participar como vendedores para que se poñan en contacto coa organización antes do 28 de febreiro, co obxectivo de coordinar a montaxe e garantir o bo desenvolvemento do evento.
A iniciativa busca atraer tanto a comerciantes como a visitantes, converténdose nun novo atractivo para Outeiro de Rei e contribuíndo á dinamización do municipio. A feira está organizada pola Asociación de Veciños Santa Isabel e conta coa colaboración do Concello de Outeiro de Rei, que apoia esta proposta como unha nova vía para fomentar a participación veciñal e a actividade local.