Deportes

Desde a organización sinalan que para cada unha das saídas se informará da posibilidade de reservar xantar en restaurante ao remate da ruta

A Asociación de Veciños de Cabreiros inicia este sábado o seu programa de rutas de sendeirismo para o ano 2026, unha proposta que inclúe catro percorridos pensados para seguir fomentando a actividade física e o descubrimento de espazos naturais en boa compañía. A iniciativa, que conta coa colaboración do Concello de Xermade, combinará natureza, convivencia e patrimonio ao longo da primavera.

A primeira cita será o sábado coa Ruta polo Belelle e bancos de pedra, un itinerario circular de 10 quilómetros e dificultade baixa. O domingo 12 de abril celebrarase o Camiño Real Lugo–Friol, un percorrido lineal de 14 quilómetros tamén de dificultade baixa. O programa continuará o sábado 25 de abril coa Ruta da Ventureira, en Capela, de carácter circular e 12 quilómetros de distancia. A última proposta terá lugar o domingo 31 de maio co Camiño de Inverno entre A Pobra do Brollón e Monforte, unha ruta lineal de 13 quilómetros igualmente accesible.

Desde a organización sinalan que para cada unha das saídas se informará da posibilidade de reservar xantar en restaurante ao remate da ruta, así como da opción de desprazamento en autobús para facilitar a participación. As persoas interesadas poden ir anotando xa as datas no seu calendario e obter máis información a través do teléfono 686 10 47 80.

Coa posta en marcha deste programa, a Asociación de Veciños de Cabreiros reforza a súa aposta por promover hábitos saudables e poñer en valor os recunchos naturais do territorio a través dunha oferta aberta á veciñanza.