A biblioteca das Pontes acolle un obradoiro de customización de prendas

Será o luns 25 e está dirixido á cativada co patrocinio da Deputación da Coruña

A Biblioteca Municipal do Concello das Pontes organiza, co apoio da Biblioteca da Deputación da Coruña, un obradoiro de customización de prendas dirixido á cativada con motivo do Día Internacional contra a Violencia de Xénero.

O taller terá lugar o luns, 25 de novembro, ás 17:00 horas, nas instalacións da Biblioteca Municipal, e está destinado a nenos e nenas a partir de 7 anos. O obxectivo principal desta actividade é promover a igualdade e rachar cos estereotipos a través do deseño creativo e a personalización de roupa.

Para participar, as persoas interesadas deberán levar unha camiseta branca como base para o seu deseño. A inscrición realizarase directamente na Biblioteca Municipal.