A Biblioteca de Guitiriz acolle o obradoiro de iniciación ao lettering
![cartel-obradoiro-lettering-guitiriz](https://terrachaxa.com/wp-content/uploads/2024/08/cartel-obradoiro-lettering-guitiriz.jpg)
O A biblioteca municipal do Concello de Guitiriz acolle o próximo xoves 8 de agosto o obradoiro de iniciación ao lettering Debuxar letras, impartido por Alba Ibañez Farto. Trátase dun curso no que se darán os primeiros pasos na técnica do lettering, tamén coñecida como rotulación, que consiste en debuxar as letras con diferentes técnicas e utensilios como pinceis, rotuladores ou tinta. A idea é a de sentar as bases para que os asistentes sigan practicando na casa e poidan chegar a debuxar as letras con soltura, creando a súa propia obra.
Neste obradoiro, orientado a un público en idade escolar, a rapazada descubrirá o desenvolvemento creativo, así como as virtudes desta disciplina, xa que por exemplo favorece a concentración e a relaxación. As prazas son limitadas, polo que as persoas interesadas en asistir terán que inscribirse na propia biblioteca dende o 2 ao 7 de agosto en horario de 9:00 a 14:00 horas. A inscrición é completamente de balde.
O obradoiro Debuxar letras contará con dúas quendas de diferente duración. A primeira terá unha duración de 45 minutos, indo dende as 10:45 ás 11:30 horas, mentres que a segunda terá unha duración dunha hora, dende as 11:45 ás 12:45 horas.