A Biblioteca de Guitiriz repartirá caldo de gloria no Día de Rosalía
A Biblioteca Pública Municipal do Concello de Guitiriz sumarase o próximo mércores, 25 de febreiro, á iniciativa Caldo de Gloria, promovida pola Fundación Rosalía de Castro con motivo do aniversario de Rosalía de Castro.
Esta proposta cultural e gastronómica está inspirada no poema Miña casiña, meu lar, no que a autora explica como preparar un caldo humilde, convertendo un prato sinxelo nun símbolo da épica diaria da supervivencia e da dignidade do pobo galego.
Con este motivo, o vindeiro 25 de febreiro, entre as 12:00 e as 13:30 horas, celebrarase unha degustación gratuíta do Caldo de Gloria no Campo da Feira de Guitiriz. O acto contará tamén cun viño doado pola Asociación de Xubilados de Guitiriz.
Ademais, farase entrega dun mantel conmemorativo da iniciativa ata esgotar existencias. A actividade será aberta a toda a veciñanza.