A Biblioteca de Vilalba acolle un novo obradoiro familiar da Sementeira de Igualdade
O mércores 4 de xuño, celebrarase un novo obradoiro familiar no marco da Sementeira de Igualdade. Terá lugar na Biblioteca Municipal, en horario de 17:30 a 19:00 horas, e contará coa participación de Noelia Darriba, da Cooperativa Atalaias.
Baixo o título Amores a moreas, esta proposta está dirixida a familias e crianzas, cun enfoque que invita a reflexionar sobre o amor nas súas múltiples formas, entendido como a maior forza fronte ás violencias machistas.
Como novidade, durante o obradoiro estarán dispoñibles máis de 30 libros novos que se poderán levar en préstamo por primeira vez, enriquecendo así o fondo bibliográfico relacionado coa igualdade, o feminismo e a diversidade.
Desde a organización tamén se lembra que a temática do Reto Lector do mes de xullo será precisamente “feminismo, igualdade e diversidade”, polo que este obradoiro constitúe unha excelente oportunidade para comezar a mergullarse nestas temáticas.
As persoas interesadas en participar deberán inscribirse previamente a través desta ligazón.