A Biblioteca Municipal de A Pastoriza convoca o I Concurso de Tautogramas
Co gallo do Día Internacional do Libro Infantil e Xuvenil, que se celebra o 2 de abril, a Biblioteca Municipal Ángel Basanta da Pastoriza organiza o I Concurso de Tautogramas Tautogramas 2025. Esta iniciativa busca fomentar a creatividade lingüística entre os máis novos mediante a creación de textos onde todas as palabras comecen pola mesma letra.
O certame está dirixido a nenos e nenas de entre 6 e 16 anos, divididos en dúas categorías: A, para participantes de 6 a 11 anos, e B, para aqueles de 12 a 16 anos. Os traballos deberán estar escritos en galego e ter unha extensión máxima de media folla. Ademais, poden ir acompañados dun debuxo representativo.
O prazo para presentar os tautogramas remata o 11 de abril de 2025. Un xurado seleccionará dous traballos gañadores por categoría. Os premiados da categoría A recibirán un curso de iniciación ao karting no circuíto da Pastoriza e un libro, mentres que os da categoría B serán agasallados cun lote de libros.
O fallo do xurado anunciarase o 14 de abril, e a entrega de premios terá lugar o 15 de abril de 2025. A participación no concurso implica a aceptación das bases establecidas pola organización.
Con esta actividade, a Biblioteca Municipal Ángel Basanta pretende estimular o interese pola lectura e a escritura creativa entre a mocidade, promovendo ao mesmo tempo o uso da lingua galega dun xeito lúdico e divertido.