A Casa Dopeso acolle a exposición fotográfica 'Nós tamén fomos emigrantes'
A Casa Dopeso é o escenario da exposición fotográfica Nós tamén fomos emigrantes, unha mostra que reúne unha escolma de imaxes dos arquivos da Axencia EFE, unha das coleccións máis importantes de España sobre a emigración galega e española. A través de retratos próximos, a exposición narra as circunstancias vitais de xeracións pasadas, reflectindo as vivencias de nais, pais, avós e avoas que deixaron a súa terra en busca dun futuro mellor.
A mostra presenta imaxes en branco e negro captadas por fotoxornalistas de EFE, testemuñas dunha época marcada pola fame, o subdesenvolvemento e a falta de liberdade, pero tamén polo esforzo e a esperanza dun regreso. Segundo Miguel Ángel Gozalo, director da Axencia EFE entre 1996 e 2004, a esencia do fotoxornalismo reside en estar no lugar onde ocorre a noticia, algo que esta exposición reflicte con intensidade.
A iniciativa enmárcase dentro do programa Corrente Cultural, impulsado por Abanca e Afundación, co obxectivo de difundir a cultura por toda Galicia mediante exposicións itinerantes de alta calidade en colaboración cos concellos.
A exposición estará aberta ao público ata o 21 de abril. O horario de visitas será de luns a venres de 08:15 a 15:00 horas e os sábados de 10:00 a 14:00 horas.