A casa museo de Manuel María acolle este sábado o IX concurso de recitado de poemas
Escolares galegos xúntanse este sábado, 22 de marzo, en Outeiro de Rei para recitaren poemas de Rosalía de Castro e Manuel María nunha nova edición, a IX, do Concurso de Recitado Rosalía sempre viva que organiza a Casa-Museo Manuel María.
O certame congrega alumnado de ensino non universitario galego, desde primeiro de Primaria até segundo de Bacharelato e ten por obxectivo potenciar a expresión oral e a creatividade dos participantes a través do coñecemento e o recitado da poesía en galego de Rosalía de Castro e da ampla obra poética de Manuel María. A presente edición xa celebrou unha fase previa nos distintos centros educativos que participan.
A xornada deste sábado estrutúrase en quendas de mañá e de tarde, dado o número de participantes finalistas. Durante a mañá recitarán as categorías 1ª e 2ª, correspondentes ao estudantado de primaria, e durante a tarde a 3ª categoría, que se corresponde con alumnado de secundaria, bacharelato e ciclos formativos. Os recitados da mañá darán comezo ás 11.15 e os da tarde ás 16.25. Os premios de cada categoría consistirán en material informático e en libros. No decorrer da xornada, concretamente nos momentos de deliberación do xurado, organizaranse percursos guiados polo interior da Casa-Museo Manuel María para os participantes, así como para o profesorado e familias que os acompañen.
Este actividade conta coa colaboración de Vicepresidencia da Deputación de Lugo.