A CHMS investirá 2,5 millóns de euros en mellorar o saneamento de Guitiriz
![FIRMA PROTOCOLO CHMS GUITIRIZ SANEAMENTO PORTADA](https://terrachaxa.com/wp-content/uploads/2023/03/FIRMA-PROTOCOLO-CHMS-GUITIRIZ-SANEAMENTO-PORTADA.jpg)
Un colector en moi mal estado provoca entrada de auga limpa á rede saneamento e dificulta o funcionamento óptimo da EDAR.
José Antonio Quiroga, presidente da Confederación Hidrográfica do Miño-Sil (CHMS), Organismo autónomo dependente do Ministerio para a Transición Ecolóxica e o Reto Demográfico, e Marisol Morandeira, alcaldesa do concello de Guitiriz, rubricaron o protocolo que establece o marco de colaboración, para o financiamento, disposición de terreos, execución e entrega das actuacións do Proxecto de renovación do colector paralelo á vía do ferrocarril en Guitiriz.
Na actualidade o colector interceptor da rede de saneamento, paralelo á vía de ferrocarril, atópase en moi mal estado de conservación e supón unha importante entrada de auga limpa á rede saneamento que chega ata a depuradora, o que impide o funcionamento adecuado do sistema de depuración.
No ano 2020 este colector foi inspeccionado con cámara de vídeo, detectándose importantes infiltracións de augas, a inviabilidade da súa reparación e a necesidade de executar un novo.
En aras da colaboración entre administracións, a Confederación Hidrográfica do Miño-Sil cofinanciará as actuacións necesarias para a construción do novo colector, paralelo á vía do ferrocarril, que comezará nas proximidades do apeadeiro ata a entrada da EDAR, cunha lonxitude aproximada de 1500 metros.
Estas actuacións, que supoñen un investimento de 2.500.000 euros, mellorarán a calidade das augas e dos ecosistemas fluviais afectados polas deficiencias do saneamento actual.
![FIRMA PROTOCOLO CHMS GUITIRIZ SANEAMENTO](https://terrachaxa.com/wp-content/uploads/thumbs/2023/03/FIRMA-PROTOCOLO-CHMS-GUITIRIZ-SANEAMENTO-200x266.jpg)