A Deputación adxudica obras por valor de 900.000 euros en seis concellos da provincia
A Xunta de Goberno da Deputación de Lugo acordou este venres aprobar a adxudicación, por importe de 900.000 euros, para mellorar oito estradas provinciais ao seu paso polos concellos de Baleira, O Vicedo, Vilalba, Xermade, Portomarín e Guntín.
En Baleira, a institución provincial adxudicou á empresa Grupo Bascuas 2008 SL, por 211.435,40 euros, as melloras de cinco estradas que artellan este concello da Montaña na totalidade do seu percorrido. En concreto:
• Na LU-P-0401, de Corveira a Restelo por Córneas.
• Na LU-P-0405, que une Fonteo coa Lastra.
• Na LU-P-0407, de Fontaneira a Vilar dos Adrios.
• Na LU-P-0408, desde conecta Córneas ata a Lastra.
• Na LU-P-0409, entre Córneas e Villardoi.
No conxunto destas estradas a Deputación acondicionará uns 50 quilómetros de vías acometendo en todas elas a reapertura das cunetas, reparación de desperfectos e repavimentación. O prazo de execución para todas estas actuacións é de 3 meses.
Adxudicadas tamén as obras da LU-P-6405 á empresa Carfelo SLU por 169.352,7 euros. Esta actuación no concello do Vicedo afecta ao primeiro quilómetro e medio da vía que dá acceso á praia de Xilloi, nun tramo moi transitado pola veciñanza do municipio.
Neste caso, os traballos, que terán un prazo de execución de 2 meses desde o seu inicio consistirán na mellora da pavimentación con aglomerado en quente, obras de drenaxe e reposición da sinalización.
Entre Vilalba e Xermade a empresa Explotaciones Gallegas SL encargarase con 202.622 euros da mellora en dous tramos da LU-P-6513, que é a estrada que une Vilalba con Momán.
Por un lado, os traballos afectarán desde o inicio da vía ó quilómetro 1,600 e consistirán na reapertura das cunetas, pavimentación con aglomerado en quente, sinalización vertical e pintado mediante marcas reflexivas brancas. Ademais, a Deputación acometerá a reposición de marcas viais no treito comprendido entre o quilómetro 1,600 e o 17,315. O prazo de execución destas obras será de 2 meses unha vez iniciadas.
Esta é unha das estradas máis empregadas a diario polos veciños da capital chairega e enlaza coa LU-P-2204, que comunica o núcleo xermadés de Momán coas Pontes de García Rodríguez, na provincia da Coruña. Unha vía provincial na que a institución xa destinou 1,5 millóns de euros para a súa renovación integral.
Por outra banda, a institución provincial adxudicou á empresa Francisco Gómez y Cía SL por 314.910 euros a contratación das obras de mellora en dous tramos da LU-P-4902, entre Portomarín e Guntín, na vía que conecta o Alto do Valiño con Valdeporrás por Vilaxuste.
Os traballos afectarán ao primeiro quilómetro da estrada e ao treito comprendido entre o punto quilométrico 4,100 e 11,315 e consistirán na reapertura das cunetas, pavimentación con aglomerado en quente e sinalización horizontal. O prazo de execución é de 2,5 meses unha vez iniciadas as obras.