A Deputación destina 1,4 millóns a un novo proxecto de apoio a produtores lucenses de Rubia Gallega
A Deputación aprobou un novo proxecto de apoio a produtores lucenses de Rubia Gallega dotado dun total de 1,4 millóns de euros. Esta iniciativa, que se desenvolverá durante 4 anos, inclúe axudas directas a explotacións lucenses polo primeiro parto das femias reprodutoras inscritas no rexistro xenealóxico. Son ata 500 euros por animal nacido. Os produtores deberán manter durante un mínimo de 24 meses o animal reprodutor no seu negocio tras o nacemento do xato.
Esta nova colaboración buscar incrementar o número de cabezas de Rubia Gallega nas explotacións lucenses e promover esta raza, axudando aos profesionais da provincia. ACRUGA funcionará como intermediaria entre a Deputación e os produtores, pois é este colectivo o que conta cos datos oficiais das explotacións existentes na provincia, así como o rexistro xenealóxico do gando.
Ademais das axudas directas a produtores lucenses, este proxecto contempla unha segunda liña, que implica a recría e mellora xenética dos animais nas instalacións da Granxa Gayoso Castro para a súa posterior venda principalmente en poxas. Trátase dunha colaboración directa con ACRUGA, que se leva facendo dende 2007, que favoreceu a recría de 1.650 animais, un aforro superior aos 2 millóns de euros aos produtores ao asumir a Deputación os custos da recría, así como beneficios doutros 2,4 millóns pola venda de exemplares a un prezo medio de 2.000 euros.
A provincia de Lugo conta con 576 explotacións de Rubia Gallega, que representan o 72% das existentes en Galicia. 1.400 produtores lucenses forman parte de ACRUGA.