A Deputación prepara a segunda tempada do programa Saborea a túa provincia
A Xunta de Goberno aprobou unha nova edición destas xornadas gastronómicas e lúdicas que promove a institución provincial para dinamizar a economía nos concellos e axudar na recuperación dos sectores máis afectados pola pandemia. Desenvolveranse durante o mes de agosto cun orzamento de 100.000 euros.
A Xunta de Goberno da Deputación de Lugo aprobou este venres a segunda edición do programa Saborea a túa provincia, unhas xornadas gastronómicas e lúdicas coas que busca promocionar e incentivar o consumo dos produtos de proximidade, como fórmula para dinamizar a economía dos concellos e para axudar na recuperación da hostalería, do turismo, do comercio e dos pequenos produtores, que viron moi mermada a súa actividade pola pandemia.
“Este programa tamén nos axuda a seguir consolidando o modelo de turismo polo que apostamos dende a Deputación de Lugo para favorecer o desenvolvemento socioeconómico da provincia: un turismo de calidade, sostible, non masificado, que pon en valor o patrimonio e que crea emprego, especialmente no rural”, explicou a voceira socialista do Goberno, Pilar García Porto, quen subliñou que a pasada edición tivo moi boa acollida, con máis de 200 visitantes en cada localidade.
Igual que o ano pasado, o Saborea a túa Provincia celebrase ao longo do mes de agosto de xeito itinerante en 9 concellos da provincia e contará cun orzamento de 100.000€. A diferencia da edición do 2021 terá un formato máis dinámico, con programacións de media xornada, pero mantendo os principais atractivos do Saborea: a música, as demostracións culinarias, as degustacións e as actividades para os máis pequenos.
Rutas Fluviais
A Xunta de Goberno aprobou hoxe unha medida para simplificar a tramitación das reservas para as rutas fluviais en catamarán pola Ribeira Sacra. Unha medida posible grazas á renovación da páxina web de reserva das prazas que vén de facer a Deputación de Lugo e segundo a que non é necesario facer unha notificación e autorización previa no caso da gratuidade dos billetes para os integrantes dun grupo porque, pois a través da nova web xa se poden sacar billetes nominativos coa identificación do usuario ou usuaria.
Isto elimina un paso na tramitación da reserva que tiñan que facer ata esta temporada o persoal encargado do transporte dun grupo, guías acompañantes, guías oficiais de turismo ou persoas que exerzan de asistente en casos de discapacidade.
Centros de Atención a Maiores
Por outra banda, na Xunta de Goberno aprobouse a licitación do contrato para a prestación de servizos básicos nos centros de atención a maiores de Trabada e Ribadeo por un importe conxunto que supera os 1,5M€. Concretamente, son 683.280€ no caso da residencia de Trabada e de 840.960€, na de Ribadeo. En ámbolos dous casos, o contrato terá unha duración de un ano, de xuño deste ano 2022 a xuño de 2023, coa opción de tres prórrogas anuais.
Tamén en relación coa rede de centros públicos de atención a maiores da Deputación, a Xunta de Goberno acordou licitar por un importe de 60.000€ e un ano de duración o contrato para a prestación do servizo de mantemento integral das instalacións de protección contra incendios das residencias de Trabada, Pol, A Fonsagrada, Castroverde, Pedrafita do Cebreiro e Meira.
Contratos
En materia de contratos, a Xunta de Goberno acordou a licitación por importe de 24.000€ dos servizos de mantemento e reparación dos camións do Parque Móbil da Deputación e a adxudicación do subministro de pneumáticos para os vehículos e maquinaria do Parque Móbil e da Granxa Gayoso Castro á empresa Euromaster Automoción e Servizos por preto de 44.000€.
Redacción de proxectos das reservas da biosfera
A Xunta de Goberno tamén deu luz verde ao encargo á empresa pública Tragsa, como medio propio da Deputación de Lugo, da redacción dos proxectos para poder concorrer ás axudas económicas convocadas con fondos da Unión Europea que recibirá Galicia para investir nas Reservas da Biosfera a través do Programa de Recuperación, Transformación e Resiliencia.
Unha solicitude de fondos que se enmarcan “no traballo que estamos facendo dende a Deputación para captar a maior cantidade posible de recursos da Unión Europea para seguir impulsando o desenvolvemento sostible da provincia a nivel social e económico”, subliñou a voceira socialista do Goberno.
García Porto explicou que a liña de axudas á que pode concorrer a Deputación para as Reservas da Biosfera que xestiona a institución -Terras do Miño e Ancares Lucenses e Montes de Cervantes, Navia e Becerreá- ten un importe que vai dun mínimo de 350.000€ a un máximo de 625.000€, cubrindo o 100% do custe total dos proxectos, que deben estar dirixidos á conservación e xestión da biodiversidade e dos recursos naturais, á mellora da gobernanza das Reservas, ao fomento do desenvolvemento sostible e o apoio á sustentabilidade do turismo, ou á mellora do patrimonio cultural e da paisaxe. O prazo para presentar estes proxectos conclúe o vindeiro 16 de marzo.
Remanentes Plan Único
A Xunta de Goberno aprobou a solicitude de varios concellos da provincia de aplicar remanentes do Plan Único 2021 a novas actuacións. O Concello de Muras vai destinar preto de 16.000€ na mellora de camiños nas parroquias de Irixoa e Muras e 122€ para a lona dun remolque. O do Saviñao, 8.400€ para o subministro de formigón para a adecuación das estradas do Campo da Festa a Xixiriz, de diferentes camiños deste núcleo e da vía que une Ribeira coa Broza. Finalmente, o Concello de Taboada destinará 28.000€ de remanentes do Plan Único 2021 para a pavimentación dos accesos de Pousadoiro, Castelo, Bouza de Arriba e de Abaixo.