A Deputación prepárase para concorrer a novos fondos europeos que contribúan a fixar poboación
O deputado de Promoción Económica e Social, Pablo Rivera Capón, asistiu a un programa de especialización en financiamento comunitario que se celebrou en Bruxelas no marco da Semana Europea das Rexións e das Cidades. A participación neste foro, ao que Rivera acudiu acompañado do xefe da sección provincial de Innovación e Participación Cidadá, responde á vontade do Goberno de prepararse para concorrer a novos fondos europeos, unha liña de acción que marcou o presidente, José Tomé, na súa toma de posesión co fin de que a Deputación puidese dispoñer de máis recursos económicos da Unión Europea que axuden a aproveitar e desenvolver as potencialidades da provincia, e, con elo, a crear riqueza e emprego, e fixar poboación.
Este evento brindou a responsables das administracións rexionais e locais, expertos e representantes do mundo académico, a posibilidade de poñer en común boas prácticas e coñecementos especializados en materia de desenvolvemento rexional e urbano. O principal obxectivo da Deputación de Lugo, tal e como explicou Rivera Capón, é “atopar solucións e financiamento que axuden a combater a sangría demográfica”.
Organizado polo Comité Europeo das Rexións e a Dirección Xeral de Política Rexional e Urbana da Comisión Europea (DG REGIO), este evento celébrase cada ano en Bruxelas. Nesta edición reuníronse máis de 6.000 asistentes e 600 relatores. O programa incluiu máis de 150 actos relacionados coas políticas rexionais e locais europeas.