A Deputación reafirma o seu apoio ao sector hostaleiro na Gala Provincial
A Deputada de Economía, Recadación, Facenda e Especial de Contas, Carmela López, participou na Gala Provincial da Hostalería Lucense, que tivo lugar no Restaurante Louzao de Viveiro. Durante o evento, López Moreno destacou o papel fundamental do sector hostaleiro na economía da provincia, salientando que “ademais de ser un motor de emprego e riqueza, é un auténtico embaixador do noso territorio”.
A Deputada reafirmou o compromiso da Deputación con este sector estratéxico, lembrando a colaboración coa Asociación Provincial de Hostalería a través dunha achega económica de 40.000 euros destinada á promoción turística e gastronómica da provincia.
Un dos momentos máis emotivos da gala foi a entrega dos Premios a Toda unha Vida nos Fogóns, que recoñeceron a traxectoria e dedicación de catro hostaleiros lucenses. Nesta edición, os galardóns foron para Ana María Gómez Mon, do Restaurante Río Neira (O Corgo); Benedicto Vela Santos, da Cervecería Kiko (Burela); Generoso e Amelia, da Lonxa de Burela, e Ángeles Galdo, do Hotel O Val do Naseiro (Viveiro).
Carmela López quixo expresar o seu agradecemento aos premiados e, en xeral, a todos os profesionais do sector, destacando “a súa forza, paixón e capacidade de superación”.