A Deputación renova o apoio a AEDA para reforzar a formación do sector agrogandeiro
A área de Rural da Vicepresidencia da Deputación de Lugo renovou a súa colaboración coa Asociación para a Desintensificación do Agro co obxectivo de fortalecer os recursos formativos dirixidos ao sector agrogandeiro. O acordo permitirá financiar distintas xornadas e actividades destinadas a mellorar a rendibilidade do pastoreo e das prácticas vinculadas á xestión sostible do territorio.
O deputado de Rural, Daniel García, mantivo un encontro co responsable de AEDA, Xan Pouliquen, no que analizaron o calendario de accións previstas para este ano. A programación inclúe sesións formativas centradas na alimentación de rumiantes, técnicas de pastoreo e control de malas herbas, procesos de domesticación animal, utilización de aplicacións dixitais aplicadas ao manexo do gando, métodos de análise de solos e implantación de sebes, entre outros contidos.
Desde a área provincial subliñaron que a capacitación resulta clave para garantir a viabilidade económica das explotacións que apostan por sistemas extensivos. Daniel García incidiu en que a formación é unha ferramenta esencial para asegurar a rendibilidade e a continuidade das granxas, polo que considerou prioritario facilitar ao sector oportunidades que permitan adquirir novos coñecementos e actualizar competencias.
A primeira das actividades programadas será unha xornada dedicada a prácticas para optimizar o pastoreo, que terá lugar o luns 23 de febreiro en Friol. Nesta sesión abordaranse cuestións como as técnicas para acadar o máximo aproveitamento das superficies de pasto ou as estratexias para frear a expansión de especies prexudiciais nos prados.