A DOP do queixo San Simón vendeu máis de 609.500 unidades por valor de 5,1 millóns de euros
O Consello Regulador da DOP queixo San Simón da Costa fixo públicos os datos de produción do ano pasado, coincidindo coa celebración a fin de semana próxima da Feira do Queixo.
Así, no 2023, foron certificadas un total de 609.565 unidades de queixo, o que supón un total de 575.428, 65 quilogramos para os que se usaron 5.637.778 litros de leite.
Para producir este volume de queixo sumouse o produto que saíu das 9 queixerías inscritas no rexistro da DOP, das cales 7 están en Vilalba, 1 en Abadín e 1 en Castro de Rei. Outro dato que ofrece o Consello Regulador é que contan para a fabricación con 376 gandarías inscritas para a produción do leite e só en 74 recolleuse a materia prima para a elaboración do queixo.
Todo isto implicou un valor económico estimado de 5.178.857,82 euros durante todo o ano 2023.
As cifras do 2023 son algo inferiores aos anos precedentes. No 2022 cualificáronse un total de 645.430 unidades e no anterior 631.565. Segundo explican desde a denominación de orixe os anos xacobeos teñen máis venda de produto.
Malia que o produto non se vendeu máis, a rendabilidade económica si foi maior. De feito, no 2022 o valor económico foi de 4.238.968 euros, case un millón de euros menos que no 2023.
O queixo San Simón será protagonista esta fin de semana da súa festa anual, na que estarán presentes todas as queixerías e que conta cun amplo programa de actos, tanto culturais, como gastronómico e deportivos.