A Feira do Mel e o Queixo das Pontes terá lugar este domingo
A parroquia pontesa de Goente acollerá este domingo, 13 de outubro, unha nova edición da Feira do Mel e o Queixo, unha proposta que ten como obxectivo poñer en valor dous dos produtos esenciais da gastronomía do municipio.
A cita, organizada polo Concello das Pontes, en colaboración coa Casa do Mel de Goente e Queixerías do Eume, ten como en edicións anteriores “dar a coñecer e poñer en valor dous produtos locais agroalimentarios diferenciados así como fomentar o seu consumo e ofrecendo ás persoas visitantes a oportunidade de apoiar, de forma directa, sector económico que comporta importantes oportunidades de desenvolvemento para o medio rural”, indica Elena López, concelleira de Promoción Económica.
Esta festa, que ten como finalidade promocionar e exaltar os produtos da gastronomía pontesa así como dinamizar ou sector primario, comezará ás 10:00 horas, coa apertura dos postos de mel e queixo de produtores locais e chegados desde diferentes puntos da xeografía galega así como dos postos de artesanía e alimentación.
A partir das 11:00 horas será a queda para os obradoiros de cociña, plantas e candeas e que terán continuidade ás 14:00 horas, ás 16:00 horas e as 18:00 horas
Ás 12:00 horas comezará unha degustación de petiscos elaborados a partir dos queixos de Eume e mel de Goente; da man Salomé Beiroa e André Arzúa,a través da que o Concello das Pontes quere poñer en valor a calidade, a versatilidade e as potencialidades do queixo e o mel local, por medio de diferentes degustacións.
E finalmente, ás 17:30 horas o mago Roberto Lolo amenizará a sesión de tarde da Feira Asemade habilitarase un servizo de comidas para o público asistente, que ofrecerá un menú composto por callos, tenreira asada e requeixo con mel.