A Feira do Monte acollerá un campamento de Entroido para nenos e nenas de 3 a 14 anos
A Casa da Cultura da Feira do Monte, no concello de Cospeito, será o escenario dun campamento de Entroido que se desenvolverá os días 16, 17 e 18 de febreiro. A actividade está dirixida a nenos e nenas de entre 3 e 14 anos e desenvolverase en horario de mañá, de 10.00 a 14.00 horas, con prazas moi limitadas.
O campamento ofrecerá un amplo programa de actividades lúdicas e creativas, entre as que se inclúen karaoke, baile, xogos, tiro con arco, pintura, manualidades, globoflexia, reciclaxe, inchables, festa de disfraces, pintacaras e diferentes gymkanas. A proposta busca favorecer a diversión e a participación da rapazada durante as vacacións escolares do Entroido.
O prezo de inscrición é de 25 euros e existe a posibilidade de consultar opcións de madrugadores para facilitar a conciliación das familias. A actividade conta coa colaboración do Concello de Cospeito e está organizada por Gandaina Eventos.
Desde a organización animan ás familias interesadas a formalizar a inscrición canto antes debido ao número reducido de prazas dispoñibles, destacando o carácter educativo e festivo desta iniciativa pensada para gozar do Entroido nun ambiente seguro e dinámico.