A Feira do Queixo de Vilalba consolídase cun novo éxito de público e vendas
O Concello de Vilalba fai un balance “moi positivo” da vixésimo novena edición da Festa do queixo San Simón da Costa e a IX Ruta BTT Terra Chá do queixo San Simón, celebradas na capital chairega esta fin de semana e que se consolidaron como un gran éxito.
A Praza da Constitución de Vilalba acolleu a centos de visitantes que se achegaron a gozar de dúas xornadas de posta en valor e exaltación dun dos produtos máis emblemáticos da capital chairega. “Estamos moi satisfeitos coa boa acollida do público, é un verdadeiro orgullo que cada vez coñeza máis xente a nosa festa do queixo e se animen a pasar a fin de semana na nosa vila”, afirmou a alcaldesa de Vilalba, Marta Rouco.
Unha fin de semana que estivo marcada por unha ampla e variada programación para todos os públicos e idades. Logo da apertura da feira, o sábado ás 11 horas, deron comezo as catas interactivas promovidas pola Ruta Europea do Queixo e a cata comentada por Salomé Beiroa, na que participaron preto de 200 persoas que tamén degustaron a tarta de queixo San Simón de Eduardo Balsa.
Pola súa banda, tamén a Ruta BTT Terra Chá do queixo San Simón da Costa contou cun gran número de participantes, situándose o número total de inscritos por riba dos 250 deportistas. “A combinación entre deporte e gastronomía é un gran atractivo para a nosa vila esta fin de semana, pois desta forma os participantes, ademais de descubrir o noso fermoso paisaxe natural, teñen á súa man un dos nosos grandes tesouros gastronómicos, o noso queixo San Simón”, asegurou a rexedora vilalbesa, Marta Rouco.
Ademais, a xornada do sábado tamén contou con animación musical a cargo da Banda A.C. de Andrade, un taller de cociña infantil con queixo San Simón no que participaron unha vintena de nenos e nenas e o pregón do humorista Carlos Blanco, quen co seu humor e carisma destacou a tradición e a popularidade do queixo San Simón.
Finalmente, a primeira xornada da festa rematou cos concertos de De Ninghures e Fillas de Cassandra na Praza de Santa María aos que seguiu a actuación de Eventec Discoteca Móbil. “Foi un gran éxito e un verdadeiro pracer ver a Praza de Santa María ateigada de persoas para gozar dos concertos e festexar o noso queixo San Simón” valorou a concelleira de Feiras e Mercados, Paula Vigo.
A xornada do domingo, como vén sendo habitual, rexistrou a maior afluencia de público, ao coincidir, ademais, a Festa do queixo San Simón coa tradicional feira mensual de Vilalba. “Coma sempre o domingo foi un cheo absoluto, a carpa estivo repleta de visitantes dende primeira hora da mañá e a nosa satisfacción é absoluta”, salientou a rexedora vilalbesa, Marta Rouco.
Ademais, Rouco quixo trasladar o seu “agradecemento a todas as persoas que pasaron pola nosa vila esta fin de semana e que foron chave para que hoxe poidamos falar deste éxito. Así como tamén a todas as persoas implicadas na organización da feira e da ruta BTT, sen esquecernos por suposto dos vendedores e vendedoras que fixeron posible que, un ano máis, Vilalba fora protagonista no calendario galego de festexos”.
Montse Valcárcel destaca o potencial de Vilalba para a transformación de produtos do sector primario
A deputada do BNG no Parlamento de Galicia Montse Valcárcel participou na Festa do Queixo de San Simón da Costa, acompañada polo concelleiro Constantino Alvite e membros do BNG en Vilalba.
Montse Valcárcel declarou “Vilalba ten un potencial inmenso para a transformación de produtos do sector primario, a nosa gandaría é referencia, e debemos impulsalos para acadar ser a referencia da produción de alimentos da Terra Chá”.
Por outra banda, Montse Valcárcel felicitou a todas e todos os produtores que están a traballar cada día para que Vilalba sexa unha referencia na produción alimentaria de calidade "é un orgullo que nos concellos do noso país haxa xente que transforma o que a terra nós dá,e que continuen co compromiso de producir aquí, e amosar que a tradición, o amor polo propio e bo facer son as chaves dunha sociedade que avanza”.