A guitiricense Ana María Pérez, distinguida na segunda edición dos Premios Axentes TIC da Rede CeMIT

A profesional recibiu dous galardóns: o primeiro premio na categoría “Espazo Maker” pola proposta Promoción da Torta de millo, e o segundo premio na categoría “Maiores dixitais"

A Axente TIC responsable da Aula CeMIT do Concello de Guitiriz, Ana María Pérez, foi recoñecida na segunda edición dos Premios Axentes TIC da Rede CeMIT, nun acto celebrado o pasado 20 de novembro no Centro Gaias Tech da Cidade da Cultura, en Santiago de Compostela, durante o encontro Dinamíza(TIC), o III Encontro de Axentes TIC.

A profesional recibiu dous galardóns: o primeiro premio na categoría “Espazo Maker” pola proposta Promoción da Torta de millo, e o segundo premio na categoría “Maiores dixitais” polo proxecto Tecnoloxía para recordar.

Estes recoñecementos poñen en valor o labor desenvolvido dende a Aula CeMIT de Guitiriz na promoción da innovación, a creatividade e a alfabetización dixital entre distintos colectivos da poboación.