A industria téxtil e o seu impacto ambiental será o tema dunha charla en Cabreiros
A Casa Escola do Chao Cabreiros, en Xermade, será o escenario este martes, 1 de abril, ás 17:30, dunha charla fundamental sobre moda sostible e impacto ambiental. A actividade está organizada por Cáritas Diocesana de Mondoñedo-Ferrol en colaboración co Concello de Xermade e busca sensibilizar á cidadanía sobre os efectos da industria téxtil no planeta, propoñendo alternativas responsables para un consumo máis ético e sostible.
Durante a sesión, falarase sobre o impacto ambiental e social da moda actual, destacando os problemas que xera o modelo de produción e consumo rápido. Explicarase a importancia da reutilización e da reciclaxe téxtil como solucións sostibles para reducir a pegada ecolóxica e fomentar unha economía máis circular. Tamén se abordará o traballo que desenvolve Cáritas na transformación social a través da moda, impulsando proxectos que favorecen a inclusión social e a creación de emprego a partir da reciclaxe de roupa. Finalmente, ofreceranse recomendacións prácticas para que cada persoa poida contribuír ao cambio no seu día a día, adoptando hábitos de consumo máis responsables.
A entrada será de balde e está aberta a todas as persoas interesadas en coñecer máis sobre o impacto da moda no medio ambiente e en descubrir alternativas para un estilo de vida máis sostible. Unha oportunidade perfecta para reflexionar sobre a nosa maneira de consumir e aprender como vestir con conciencia.