A Liga Santaballesa acolle este sábado unha xornada sobre a emigración galega a Cuba
A Liga Santaballesa celebrará este sábado 29 de novembro, ás 17.00 horas, unha nova edición das Xornadas da Emigración Galega: De Galicia a Cuba, un encontro divulgativo que busca afondar na historia dos vínculos entre ambas as terras e no papel que a diáspora xogou na vida social e cultural de Galicia.
O acto contará coa participación de Juana Caridad Fernández, presidenta da Agrupación de Sociedades Representativas de Municipios e Parroquias de Galicia en Cuba, e do historiador Daniel Manuel Vázquez Vila. Ambos serán os encargados de ofrecer unha completa visión sobre os procesos migratorios que marcaron xeracións de galegos que cruzaron o Atlántico en busca de novas oportunidades.
A organización destacou que a xornada pretende ser tamén un espazo de encontro e convivencia, polo que as persoas asistentes poderán desfrutar dun pequeno tentempé e café ao remate das intervencións. Desde a Liga Santaballesa anímase a toda a veciñanza a participar nesta cita divulgativa que pon en valor a memoria colectiva e a pegada da emigración na identidade galega.