A Liga Santaballesa celebra este domingo o Nadal con varias actividades
A Liga Santaballesa acollerá este domingo, 28 de decembro, unha xornada especial dentro da programación de Nadal, cunha tarde chea de actividades pensadas para todos os públicos. A proposta combina teatro infantil, actos simbólicos, gastronomía e humor, co obxectivo de fomentar a participación veciñal e celebrar estas datas nun ambiente festivo.
A programación arrancará ás 16.00 horas coa representación da obra infantil A Apalpadora, a cargo de Velaísca, unha proposta dirixida especialmente ao público máis novo. Unha hora máis tarde, ás 17.00 horas, terá lugar unha plantación simbólica, como xesto de compromiso coa contorna e cos valores de respecto ao medio natural.
A xornada continuará ás 17.30 horas cunha chocolatada aberta ás persoas asistentes, converténdose nun punto de encontro para compartir e desfrutar en comunidade. O peche do programa chegará ás 19.00 horas co monólogo de Quico Cadaval, que achegará humor e reflexión para rematar a tarde cunha proposta cultural de primeiro nivel.
Esta programación de Nadal conta coa colaboración da Asociación de Amigos da Liga Santaballesa, da Deputación de Lugo, a través da súa Vicepresidencia, e da área de Cultura, facendo posible unha iniciativa que reforza a oferta cultural e festiva no rural durante estas datas sinaladas.