A Liga Santaballesa organiza unha charla-coloquio sobre hormonas e benestar
A Liga Santaballesa organiza este venres 28 de novembro, ás 20.00 horas, unha charla-coloquio titulada Hormonas e benestar, que estará impartida por Lucía Lorenzo Ledo, óptica optometrista pola Universidade de Santiago de Compostela.
A actividade pretende crear un espazo seguro para compartir coñecementos, derrubar tabús e fomentar a conexión co propio corpo, entendendo que o autocoñecemento constitúe tamén unha forma de liberdade persoal.
Durante o encontro, a especialista abordará como as hormonas inflúen no organismo e nas emocións, ademais de ofrecer claves para atopar o equilibrio e favorecer o benestar en cada etapa da vida. A organización destaca que a sesión busca ofrecer información accesible e promover o diálogo arredor dun tema fundamental para a saúde e a calidade de vida.
A actividade conta cunha achega simbólica de dous euros para socias e catro euros para non socias, e inclúe petiscos, café ou infusión.